انا مش عارف تارى مع مين
ولا عارف الضرب منين
ورقدت ببارود اعداء
مااعرفش مساعدهم مين

متلتم انا شفته بعينى
بسلاح الغدر بيرمينى
...
وانا قاعد مستنى ادان
المغرب بهدومى الميرى

وفطارى المحطوط قدامى
بالدم اتلون به مكانى
وسمعت الصرخة حواليه
م الجرحى والشهدا اخوانى

الرملة بسينا حضنتنا
والجرحى شافوا نهايتنا
والصورة اتنقلت للعالم
من قبل ما تعلم حكومتنا

اعلامنا كان شغال عادى
افلام ومسلسل ع الفاضى
مستنى الامر لينعينا
وكأن موتيتنا شىء عادى

ولحد ما استلموا الامر
م السيد وصاحب الامر
كان نعيى مكتوب بشريط
ع الشاشه وبصمت امر

وحدودنا بعد الاخبار
راح زارها كبار الزوار
بحراسة من شرطة وجيش
وجثثنا ع الارض مزار
ارواحنا فى السما بطوف
وروفتنا ملفوفه بصوف
فى مكانها من غير تصريح
للدفن بيحضنها الخوف

وانتشرت كل الاخبار
هنرد وهناخد التار
ولحد اليوم انا مستنى
مش عارف مين ضرب النار

ضربونا وهتبقى قضية
ايام وهتكون منسيه
وتعدى بشجب وتنديد
دى سياسه معروفه عالميه

من قبلى راح شهدا كتير
والكل اتلف فى بشاكير
وحقوقهم ضاعت والديه
من حاكم فى السجن اسير

انا حقى فى الاخره هييجى
وياه هيعود تغريدى
وهكبر للواحد العادل
والدنيا تشهد على عيدى

وساعتها هقولها للحاكم
انا تارى خدهولى القادر
العالم مين ضرب النار
ولحقى ميزانه كان عادل

يامصر اوعى تبكينى
انا ليكى وحضنك يكفينى
فى الدنيا علمت ولادى
اروحنا فداكى يانور عينى

دى رسالة وبحق رقادى
من قبرى عليكم بتنادى
اعدائكم اولاد صهيون
وجنودكم خير الاجناد

وبحق الشهدا والصوم
اياكم تنسوا من اليوم
احلام القدس المسجون
بايدين ابناء الصهيون

ده عهد واتلعهد امانه
بكفايه ياولادى مهانه
الارض داسوها الاغراب
وسكوتكم والله خيانه