يوميات سيناوي بسيط .......,...... بين واقع الحظر ومخاوف التهجير
كتب : جمــــال أبــو هاشــــــم
السبت 3 سبتمبر 2016
أنا واحد من الناس اللي بشوف نفسي اتهجَّرت فعلياً من شمال سيناء، وغيري حالات كتير.. بس هتكلم هنا عنّي وهشرح ازاي تم التهجير ده.
طبعاً الدولة مهجّرتش حد من بيته عمداً ولا أمرِته يخلي بيته ويسيبه بالقوة.. الا عدد من الاسر والاهالي بمحاذاة الشريط الحدودي برفح، او قرى جنوب الشيخ زويد.. دول بس اللي اتهجّروا بقرار رسمي.
يوميات سيناوي بسيط .......,...... بين واقع الحظر ومخاوف التهجير
*******************************************
طيب، ازاي وانت في العريش اتهجَّرت؟! .. انا وغيري من الشباب اتهجّرنا بشكل غير مباشر، يعني احنا هنخليك تكره حياتك جوة البلد، وهنخنقك وهنضايقك ومش هنوفرلك مصدر دخل تعيش زي اقل بني آدم عايش في مصر، وهنخليك عُرضة للانفجار والموت ، ولو اتكلمت فاعمل حسابك انك مش هتشوف الشمس تاني.. ويقولك بعد كل ده انت مشيت بمزاجك محدش قالك امشي.
طيب، قولي لما واحد يخرج من بيته متوضي، وعامل حسابه انه فى أي لحظة هيموت، سواء من الارهابيين، او من رصاصات الأمن والقصف العشوائى .. مش آمن على نفسه ولا حياته.
لما واحد قفلوا عليه كل مصدر دخل فى حياته، يعني انت لو موظف حكومي ومتعين فانت لحقت خلاص نفسك كل عيش واسكت “رغم أن كمان الوظائف بيوزعوها على قرايبهم من خارج سيناء أصلا وبيرموا كام وظيفة لأهل البلد او سكانها” .. غير كده يا تشوفلك محل تشتغل فيه، او تاكسي او عربية تشتغل عليهم.. طب واللي مش عايز يشتغل على تاكسي او يفتح محل ولا يبقى موظف حكومي يعمل ايه؟ ينتحر؟ مع احترامي طبعا للناس اللي بياكلوا عيش بالحلال دول وبيعافروا مع الوضع اللي عايشين فيه.
ولما اعيشك في مساحة مقفولة متخرجش منها، كل ما تسافر على الطرق هقرفك، هخليك تكره اليوم اللي انت مسافر فيه.. الطريق ابو ٣ ساعات هخليهولك ١٢ ساعة، وحتى لو وصلت للمكان او المحافظة اللي انت رايحها، هخليك تمشي تتلفت حواليك خايف يتقبض عليك بسبب بطاقتك اللي فيها محل إقامتك شمال سيناء.
لما اقطع اي وسيلة اتصال عنك من طلوع الشمس لحد غروبها، اتصالات ارضية او انترنت او موبايل، معزول عن العالم.. ولما برجع الاتصالات ليك آخر النهار بخليك تتمنى لو اني اقطعها عنك تاني بسبب سوء الخدمات وقرفها والعذاب اللي بتتعذبه عشان تستخدمها.
لما اخليك تقف تتفرج على كوبري السلام فوق قناة السويس وهو مقفول، واخليك تنتظر بالساعات على معديات العبور من الشرق للغرب والعكس، وانا متكدر وبتعانى .
لما اقطع عنك المية واجيبهالك يومين فى الاسبوع، والكهرباء “بعض المدن ساعات الكهرباء بتقطع فيها بالاسبوع” ، لما اعطّش ارضك، او اجرّفها واحرمك تاكل من وراها عيش.
اما تكون بين مطرقة وسندان الأمن والتكفيريين.. دايق مرار ونار وحاطط جزمة فى بقك مش عارف تنطق، مفيش حاجة بايدك تعملها.. غير انك تدعي وتسكت.
هقتل حلمك في شغل بكارييرCareer او مجال انت بتحبه، ونفسك تعلى وتكبر فيه، هشيل من دماغك فكرة انك تربي عيالك ف امان وبيئة سليمة مش مدمرة نفسيا زي دي، هخليك تلغي فكرة الجواز اصلا من دماغك.
باب في سيناء تعرف معنى الوطنية اكتر من اي حد بيحاول يخوّنهم..
قولي ايه اللي فاضل يخلّي شباب سيناء يقعد فيها؟ كرّهوا الناس فى عيشتهم، كرهوها حرفياً اقسم بالله.. حلو كلام هنعيش ونموت فيها وعمرنا ما هنسيبها، ويشهد ربي أن جزم الناس والشباب في سيناء تعرف معنى الوطنية اكتر من اي حد بيحاول يخوّنهم.. بس ايه اللي اتعمل عشان يكملوا حياتهم ع الارض اللي اتولدوا واتربوا فيها؟
مش هعيش في نظريات مؤامرة وده تعمّد أن الناس تهاجر وتمشي وتعمل زي اللي سافروا يشتغلوا سواء برة مصر او في محافظات تانية، ولا أن ده مخطط بيتنفذ عشان يفضّوا البلد من اهلها.. بس اللي اعرفه أن الناس عايزة تاكل عيش وتعيش زي اقل بني آدم عايش في البلد.. وان الناس تعبت، تعبت جدا.
احنا اتمرمطنا كتير اوي، اوي.. والروح مبقتش قادرة تشيل اكتر من كده، تعبنا.. خلّوا اقصى طموح الناس أن وسائل القرف والعذاب دي تخف شوية، مش بس تروح ويرفعوها عنهم.. الناس ارواحهم ماتت، وبقوا اسما عايشين.. بس في الحقيقة هما فى تعداد الموتى من زمان.
جمــــــــال أبــــو هاشـــــم
ساحة النقاش