ساعات التليفون يرن و تبقى مش عايز ترد تكتفي تشوف الاسم و تدوس علي الزرار اللي هيوقف صوت الرن ,ساعات تشوف ان فيه رسالة جاتلك علي الإنبوكس بس مش بتفتحها و بتكتفى إنك تشوفها من برّا ,ساعات تسمع اللى بيناديلك و ماتردش او تعمل نفسك ماسمعتش لحد لما تضطر ترد بعد ما يندهلك مرة تانية.ساعات كدا تبقي موجود .. لكن مش موجود , الجسد و الروح موجودين .. لكن العقل و القلب قرروا الانسحاب و الانعزال عن كل حاجة , زي ماتكون واخد أجازة بالعافية عن الكل.يمكن ده بيبقي عشان الانسان فقد شهيته علي الاندماج في الحياة عشان اتعرض لخيبات أمل و خذلان كتيرة , او يمكن ده بيبقي عشان جوا الانسان شحنات و طاقة سلبية مش حابب يتكلم فيها ولا يطلعها علي حد .. و في الأرجح بيبقي مقتنع انه حتي لو حكي و قال اللي جواه محدش هيفهمه فبيكتفي انه يخليها بينه و بين نفسه.عشان كدا بننسحب كتير .. بننسحب عشان نحاول نهرب من الواقع اللي عمال يخلي الحزن يتراكم علينا .. بننسحب عشان بدأنا نحس ان بقي جوانا جزء كبير من البرودة و عدم الاهتمام و اللامبالاة .. و بننسحب عشان نعرف نكمل من غير روح
