آآآه يابلد .. كلمات : عاطف البرديسي
......
يحدث فى مصر : تتعاقب الحكومات تلو الأخرى ؛ ومصير المواطن لم يتغير !!
أيام بتفوت
وناس بتغرق وتموت
والحال زى ماهو
واللى مش عاجبه
ياخد بالشلوت
أجيال
ورا أجيال
من أيام
م كنا عيال
لحد م كبرنا
وأصبحنا رجال
شايفين وعايشين
على دة الحال
قال تغيير قال !!
الكل قبل كدة
قال
من أيام ماكان
رئيسنا جمال
والمواطن
على دة الحال
إيه الجديد ؟!
والقلوب بقت
أنشف من الحديد
الكلام مش هيفيد
وأنا متشائم
ومش شايف
أى جديد
ولو أعترضت يحطوا
فى إيدى الحديد
الشباب ياحكومة
بتغرق
عاوزة تسافر
تشتغل وتعرق
آآآه يا أم الولد
هاجر وترك البلد
غرق وسط البحر
بالليل والوقت
كان سحر
قبل دخول الفجر
فى ليلة أختفى
فيها البدر
فاكرين عبارة السلام ؟
غرقت بالليل
والناس نيام
كانوا راجعين
لبيوتهم
صرخوا إلحقونا
محدش سمع
صوتهم
آآآه وآآآه يابلد
يا للى مالينا
فيكى سند
سلمنا أمرنا
لله الواحـد الأحد
