مرغم عليك يا صبح مغصوب يا ليل 

لا دخلتها برجليا ولا كان لي ميل   

شايليني شيل دخلت انا في الحياه 
وبكره حاخرج منها شايليني شيل 
               عجبي !!!

في يوم صحيت شاعر براحة وصفا
الهم زال والحزن راح واختفي 
خدني العجب وسألت روحي سؤال 
أنا مت ؟  ولا وصلت للفلسفة 
عجبي 
علي بعد مليون ميل من أرضنا 
من الفراغ الكوني بصيت أنا 
لا شفت فرق بين جبال وبحور 
ولا شفت فرق ما بين عذاب أو هنا 
عجبي 
إنسان أيا إنسان ما أجهلك 
ما أتفهك في الكون وما أضألك 
شمس وقمر وسدوم وملايين نجوم 
وفاكرها يا موهوم مخلوقة لك 
عجبي !!!
سرداب في مستشفي الولادة طويل 
صرخات عذاب ورا كل باب وعويل 
.. وفي الطريق متزوقين البنات 
متزوقين للحب والمواويل 
عجبي !!!
ضريح رخام فيه السعيد اندفن 
وحفرة فيها شريد من غير كفن 
مريت عليهم .. قلت يا للعجب 
لاتنين ريحتهم فيها نفس العفن 
عجبي !!!
علقت ع المسمار قناع مهزلة 
ومعاه قناع مأساه بحزنه ابتلا 
بصست لقيتهم يشبهوا بعضهم 
واهو ده العجب يا ولاد وإلا فلا 
عجبي !!!
الفيلسوف قاعد يفكر سيبوه 
لا تعملوه سلطان ولا تصلبوه 
ما تعرفوش إن الفلاسفة يا هوه 
اللي يقولوه بيرجعوا يكدبوه 
عجبي !!!
نظرت في الملكوت كتير وانشغلت 
وبكل كلمة ليه وعشانيه سألت 
أسال سؤال الرد يرجع سؤال 
وأخرج وحيرتي أشد مما دخلت 
عجبي !!!