11 شارع العزيز عثمان - الزمالك
الزمالك, القاهرة, مصر.سوبر ماركت16848
01007625165
01147956501

صني سوبر ماركت: والله وبعودة في الزمالك

نشرت فى: 22/06/2014

بقى لنا كثير ما كتبناش عن سوبر ماركت، وبالذات في الزمالك؛ يمكن لأنها من المناطق اللي مش ناقصها سوبر ماركت كبير ثاني يفتح، وخصوصًا أن فيه أسماء كبيرة موجودة زي ألفا ماركت ومترو ماركت.

إلا أن "صني – Sunny" –زي ما وهو واضح من عنوان المقال- كان فاتح في الزمالك من زمان، حتي قبل أيًا من الاسمين اللي ذكرناهم. بس عارف أنت نوعية المحلات اللي بـ تنزل عليها لعنة غريبة، فتفتح وتقفل عشرات المرات، وكل مرة لسبب مختلف... "صني" كان من نوعية المحلات دي. من سنة بدأت التجديدات، وبالفعل فتح السنة دي، بعد ما كان مغلق لمدة 10 سنين على أقل تقدير.

وبما أننا عاصرنا المكان قبل الدراما اللي حكينا عنها، فالتجديدات والشكل الحالي للمكان فكرنا بالذي مضى، المساحة الواسعة نسبيًا -لمحل من دور واحد- مستغلة بشكل عملي، ولكن أيضًا بشكل مبالغ فيه. كمية المعروضات رهيبة، لدرجة أننا أخذنا وقت علشان نهدأ كده ونعرف إحنا فين بالضبط... ده كده وإحنا داخلين نأخذ فكرة، تخيل لو هـ نشتري؟ حقيقى أن الواحد يبقى حافظ أماكن الحاجة في السوبر ماركت اللي متعود عليها دي نعمة!

على يمينك وأنت داخل قسم الخضروات والفاكهة. والحمد لله أنهم ثلاجتين صغيرين علشان واضح جدًا من شكل المعروضات أن السحب مش قوي. بعدهم أرفف القهوة والكاكاو سريع التحضير بأنواعهم، الجميل أن فيه أنواع لم يُر مثلها في البلاد... مستوردة يعني.

في منتصف المكان موجود ثلاجات الجبن واللحوم الباردة، وزي أي سوبر ماركت الأنواع متوفرة وبـ يتم تقطيعها حسب الرغبة. وبما أننا بـ نتكلم عن الثلاجات، فيه ثلاجة ثانية كبيرة كلها أنواع المشروبات والعصائر اللي خلقها ربنا، ومجموعة من الوجبات سريعة التحضير والساندويتشات الخفيفة، اللي مش محتاجة سوى تسخين سريع، من ماركة اسمها "مرحبا"، بس شكلهم ظريف.

بديهي جدًا أن أي سوبر ماركت كبيرة يبقى فيها منظفات وشامبوهات، إلخ، إلخ، إلخ... إلا أن وجود قسم للأدوات المنزلية حتى ولو صغير بقى حاجة مهمة، ده لأن أحيانًا الواحد مننا بـ يحتاج مج، معلقة، طاسة تقضي الغرض وتسعف... إزاي؟ ما نعرفش، بس بـ تسعف! أما المبهج فعلًا هو وجود سوشي بار تابع لـ جو سوشي – Jo Sushi، وله منيو مخصوص فيه رقم سريع للتوصيل... المنيو كمان مكتوب بالإنجليزية واليابانية، بالرغم من أنهم ممكن يجمعوا أي حروف آسيوية جانب بعضها، وإحنا مش هـ نحس بحاجة، بس ما علينا... الناس دي ما بـ تهزرش برضه.

وبما أن شراء طلبات البيت عادة مهمة بـ تقوم بها ست البيت، وأحيانًا مزاج شخصي عند ندرة من الرجال، فموجود كوفي شوب صغير لكل اللي مجبرين أنهم ينزلوا نزولة طلبات البيت، فممكن تأخذ قهوتك عقبال ما البيه/ المدام يقضي/ تقضي الطلبات. اللي لفت نظرنا في المكان أن عربيات الأطفال –واللي بـ تعتبر وسيلة إلهاء ذهبية لأي أب أو أم- كبيرة بالنسبة لحجم المكان... فأنت وارد تدهس طفل اللي جانبك وأنت مش واخد بالك.

مزيد من الصور

• 

• Post to Facebook
• Post to Twitter
• Post to StumbleUpon
• Post to Digg
• Add to Reddit
• Post to Google+
• Post to Delicious
• Send via Gmail
• Add to LinkedIn
• Add to Pusha
• Add to MySpace
• Add to Diigo
• Send via Buzzster!
• Post to BlogMarks
• Add to Mister-Wong
• Send via E-mail program

التعليقاتموضوعات ذات صلههوم-هاوس أكسيسوريز: محل لطيف وغني بالمعروضات في الزمالك3 ش البرازيل - بجانب مكتب البريد - أمام موبينيل, الزمالكلو كنت فاكر أن حي الزمالك المفعم بالحياة اكتفى بالمحلات اللي فتحت فيه لحد دلوقت تبقى غلطان! المحل ده موجود في شارع البرازيل الصاخب والسريع في الزمالك أمام «نولا كب كيك – Nola Cupcakes»، محل صغير لكن مدجج بإكسسوارات المنازل وأغطية السراير ومستلزمات المطبخ. فيه تشكيلة كبيرة جدًا من إكسسوار البيت ماركات مستوردة زي: "إكيا – IKEA" وبـ تتضمن أغطية السراير والأباجورات وحافظات الكبايات أو الحلل السخنة وكمان الأطباق، والأباريق ومستلزمات المطبخ زي براد الشاي والمنخل وألواح التقطيع. أجمل حاجة في المحل أنه على قد الجيب: الماج بـ يبدأ سعره من 10 جنيه، الأطباق سعرها ما بين 25 لحد 60 جنيه وبـ توصل لسعر 160 جنيه لو طقم على بعضه، مستلزمات المطبخ بـ يتراوح سعرها ما بين 70 لحد 200 جنيه وفيع بعض القطع غالية شوية زي طقم سكاكين المطبخ اللي ما بين 65 لحد 200 جنيه. المنتجات على الموضة ومودرن وجودتها جيدة، ودي من الحاجات المهمة اللي بـ يدور عليها أي حد بـ يشتري. كمان عندهم هناك مرايات مطرقعة بإطارات أشكالها مختلفة سواء اللي فيها جانب فني أو المودرن علشان تكون إضافة جميلة لبيتك. في رأيى الناقد كاتب الموضوع أكثر حاجة معلمة في المحل هي أرفف الأحذية وأرفف اللبس ومصنف الملابس اللي ممكن توسعها وسعرها 100 و120 و160 جنيه على التوالي. رف الأحذية ومصنف الملابس معمولين من قماش لونه "أوف-وايت" وبستاند خشب فأعطى للشكل نهائى إحساس مودرن جنان، ومصنف الملابس ممكن يستخدم أنك تصنف هدومك في سلة كبيرة قبل الغسيل، وكمان عندهم سلة معمولة من القش بمختلف درجات البني ممكن تستخدميها في أماكن كثيرة في البيت. "هوم-هاوس أكسيسوريز" عندهم كمان تشكيلة من الأباجورات وأستاندات إضاءة لكل الأذواق، بداية من إضاءة السرير الجانبية التقليدية اللي هـ تكلفك حوالى 100 جنيه وفيه كمان لمبات IKEA وممكن توصل أسعارها لحد 800 جنيه تقريبًا بناءً على الحجم والخامة المصنوعة منها، كمان هـ تلاقي هناك ساعات حائط متعددة منها اللي فيه علامات نوادي كرة قدم مشهورة زي الأرسينال وتشيلسي (45 جنيه)، وفيه اللي ممكن يوضع في حجرات نوم أطفال (350 جنيه) وأشكال ثانية عليها شغل فني على الإطار بتاع الساعة (حوالى 250 جنيه). روح هوم-هاوس أكسيسوريز لو عاوز تجيب مستلزمات مطبخك وإكسسوار لبيتك بأسعار معقولة، أكيد هـ تخرج من المحل وأنت لاقي حاجات عاجباك وحلوة، بس أهم حاجة اعمل حسابك تعطي للمحل ده شوية من وقتك علشان تعرف تدور كويس وسط زحمة الحاجات اللي في المحل.. أكيد هـ تلاقي حاجات حلوة تأخذها.مقالات ذات صلة أوليو: مجمدات لبنانية وعالمية فى المهندسين37 شارع العراق المتفرع من شارع شهاب - المهندسين, المهندسين

في الفترة الأخيرة أكثر الزوجات خصوصًا الموظفات بقوا بـ يعتمدوا على الأطعمة المجمدة زي السوسيس والبرجر والبانيه لأنها وجبات سريعة التحضير خصوصًا بعد يوم مرهق في العمل وكمان لو فيه ضيوف فجأة بـ تكون الأطعمة دى شيء منقذ.

وبما أن فريق العمل في كايرو 360 فيه متزوجات فبالطبع صادفنا "أوليو ماركت – Olio Market" للأطعمة اللبنانية المجمدة اللى موجود أمام مستشفى الصفا بالمهندسين، المكان مش كبير قوى لكن فيه منتجات كثيرة جدًا ومتنوعة وكلها لبنانية طبعًا، ما جربناهاش كلها بس جربنا أصناف كثير وكانت جيدة ولما تم طبخها كانت كأنها طازجة مش مجمدة، من الأصناف اللى جربناها: سبرينج رولز الخضار (40 جنيه) وده كان طعمه حلو جدًا ولذيذ بالنسبة للأطفال لأنهم مش بـ يأكلوا الخضار بسهولة، وفيه برينج رولز موتزاريلا وسبرينج رولز هوت دوج، وجربنا كمان سمبوسك اللحمة وكانت لطيفة جدًا وكمان سمبوسك ميكس جبنة (32 جنيه للكيلو) وجربنا كبة الخضار وكبة البطاطس وكروكيت الفراخ وفيه أصناف أخرى كثيرة.

من مميزات "أوليو" أن كل أصنافه خفيفة على المعدة وجذابة بالنسبة للأطفال خصوصًا اللى مش بـ يأكلوا الخضار أو اللحوم، وفيه كمان وجبات تنفع للمدارس زى البطاطس الكروكيت، أما من ناحية الأسعار فـ نقدر نقول أنها معقولة، مافيش توفير فيها عن شركات ثانية، لكن أوليو بـ يعمل عروض كل شهر بس مش لصنف معين لمجموعة أصناف مع بعض، وبـ يكون فيه خصم على المجموعة كلها مش على صنف واحد، يعنى مثلاً فيه عرض على فيليه كريسبي، وممبار أرز، وكفتة أرز، وكبة ميني، وسمبوسك لحمة، وسمبوسك جبنة (115 جنيه) بس طبعًا الأوزان نصف كيلو وربع كيلو، وأحيانًا بـ تكون العروض دى مفيدة لكن مشكلتها أن مش شرط أى شخص يكون بـ يحب الأصناف دى كلها مع بعض، ونادرًا لما بـ يكون فيه عروض على أصناف مفردة لكن ممكن العروض دى تكون مفيدة في العزومات أو الرحلات.

مش شرط أن أنت تروح فروع أوليو علشان تشترى، ممكن تتصل بالخط الساخن 16905 وممكن كمان تتعرف على العروض والأصناف من خلال صفحتهم على الفيسبوك، وكمان ممكن تطلب الأوردر من خلال الصفحة.

وللناس النباتيين فيه منتجات نباتية في أوليو زى سمبوسك الخضار ومحشى ورق عنب بالزيت وكروكيت البطاطس وحلقات البصل المقلية وغيرها. وكل فترة أوليو بـ يعمل منتج جديد خاص به زى "سفيحة الجبنة" وده منتج مخبوز بشكل خاص وبداخله ميكس من أنواع مختلفة من الجبن مع الفلفل والزيتون.

الاختلاف اللى ممكن نلاقيه في أوليو عن أي منتجات ثانية هى أنها مش لبنانية بالاسم فقط الطعم كمان لبنانى، وكمان دائمًا عنده جديد بـ يشدنا أننا نجربه.