انا الصعيد المنسي وليه يا بلد نسياني

طب ليه تدفنوني ياناس وانا مانيش جاني

دا كل اللي عليكم دي من قطني وكتاني

تعيشوا انتوا وموت انا مش لاقي اكفاني

صابر انا والهم علي الصبر رباني

خايف اقول الأه لحد الخوف معاراني

ولما اقول الأه تقومي انتي جالحة خنقاني

دا انا اللي بايع دمي ليكي وللموت لو جاني

ليه يابلد تشتري الغريب وابنك انا بيعاني

ليه متشترنيش وليه في الغربة سيباني

لساني بقول الأه ولساني فيكي بعاني

كُنت ديما بقول بلدي في القلب شيلاني

بلدي الاصيلة وهي الضهر سنداني

بلدي بنيلها روي ارضي وروياني

بلدي بجيشها عاشت وهي اللي حمياني

ولما اميل بحملي عليكي تقولي علي اناني

دا انا المغشوش وانا المظلوم في اوطاني

وانا الساكت وانا المسجون في غيطاني

ولما صرخت حضاني قبرك وغطاني

انا الزارع طينك وانا اللي في حضارتك باني

تطرحيلي ياوردة شوك بعد مازرعتك في بستاني

دانا اللي فيكي عاشق وحبك نهر جواني

مادح انا ارضك وانتي ديماً جرحاني

يا محملاني همومك امتي مزانك علاني

عايش في ضل لليلك وعايشة جواي احزاني

نشفت دموع عينيك وانا دموعي غرقاني

عـمري مـا شـفتك يوم في وجـعي سـألاني

ياللي انتي هواكي الموت وبايتة في احضاني

يا ما غرقاني في دمك وبنارك محوطاني

انا المقتول علي شطك وانتي اللي قتلاني

كلمات الشاعر محمود الحوامدي

المصدر: من صعيد مصر
bioabt-Alsyd

جريدة بوابة الصعيد

  • Currently 0/5 Stars.
  • 1 2 3 4 5
0 تصويتات / 186 مشاهدة
نشرت فى 15 أغسطس 2016 بواسطة bioabt-Alsyd
bioabt-Alsyd
»

بوابة الصعيد

ابحث

عدد زيارات الموقع

1,359

بوابة الصعيد