مشاكل الزواج
بنتي راجعه من الجامعه والفرحه ماليه عنيها الأتنين
وأترمت في حضني وقالتلي يامه أفرحيلي هبقي
عروسه بعد يومين
فارس أحلامي علي حصانه الأبيض جاني
وقالي هقابل أبوكي وهاخدك وأطير
قولتلها مبروك يابنتي ربنا يتمملك علي خير
هبلغ أبوكي وأحنا منتظرين
أنا عايزه أيه يابنتي غير أن أشوفك سعيده
ومرتاحة البال طول السنين
وفي اليوم الموعود!!!
وصل العريس ومعاه أبواه الأثنين
وبعد السلامات والتحيات… وتقديم الساقع
والحلويات
الفارس الهمام قاله ياعمي أنا طالب أيد بنتك
عشان تكمل معايا المشوار الطويل
رد ابوها وقاله… أهلا بيك يابني
واحنا بيك مرحبين.
أمكانياتك آيه يابني ؟
قاله طلباتك ياعمي… أمال أنا جاي ليه ؟
قاله عندك شقه ؟
رد العريس الهمام… والله هاخد قانون جديد
ماهو مش هقدر أشتري تمليك
قاله يابني وفين الآمان
بعد سنه وسنتين صاحب الملك علي حقيقته هيبان
ولو آخرت عليه شهر هيرميكوا في الشارع أنتم
والعيال
طيب ما علينا… موافق مافيش محال
طيب يابني الشبكه نظامها آيه؟
رد العريس الهمام… علي قد مقدرتي وقيمتي
هجيب شبكتي لأنها ياعمي هديتي
رد عليه ابو العروسه وقاله
بنتي شبكتها ماتقلش عن خمسين ألف جنيه
زي اختها وبنت عمها… ولا آيه ؟
قاله… ماشي ياعمي اللي تأمر بيه
ولو أن المبلغ عليه كبير… ولسه المشوار
عليه طويل
طيب العفش والجهاز… انت ناوي علي آيه
أنا هديك بنتي الغاليه وصارف عليه دم قلبي
ودموع عنيه
قاله ياعمي المعترف عليه
رد ابو العروسه وقاله ماشي جهازها ميقلش عن
ميت ألف جنيه
العريس : ياعمي دا كتير ومايقدر علي القدره
غير الرب الكبير
والد العروسه:
أنت عارف أنك هتكتب قايمه
العريس:
ماشي ياعمي ماهي علي كل الناس دايره
أبو العروسه:
الفرح أنا عايزه في فندق كبير مايقلش عن خمس نجوم
وتجيب مغني ورقاصه والأكل يبقي كتير
العريس:
أيه لزمته ياعمي دا كده تبذير
ما نكتب الكتاب في الجامع ونعمل فرح علي قدنا
وانا وعروستي هنبقي فرحانين
ليه ياعمي بتعقدها أحنا محتاجين التيسير
انا في بداية حياتي والعمر قدامنا كبير
عموما ياعمي أنا غيرت التفكير
مش هتجوز وهعيش حياتي أمير
وخلي بنتك جنبك لما يجلها المليونير
وأبقي أعزمني علي الفرح والبوفيه الكبير
وباظت الجوازه… وانكسرت فرحة البنت
والبيت بقي جنازه
وبيقولوا آيه سبب العنوسه؟
هو صحيح تحكمات آهل العروسه؟
والله و أنا مفروسه.
بقلم/نجاة فؤاد
أعجبنيأحببتههاهاهاواااوأحزننيأغضبني
