تجار الهباب
وسع يابني وسع
ياللي ماشي بتتقصع
جايين نحكي الحدوتة
ومعانا فرشين بسكوتة
وسنجة وفرد ومطوة
وطلق وكام مأروطة
تدينا تلاتات تلاتات
نديك سبعات سبعات
ملناش في التومناية
ولاتلزمنا السلخاية
ولا بنحب التخميس
أصل التخميس للسيس
كيفنا على كيف كيفك
نفسين وهتشهر سيفك
وتقوم وتحارب ظلك
ويقوللك عيب أنا ضيفك
تسمعه ماتصدقهوش
وتجيب مسمار وشاكوش
وتمسمره كدا ع الحيطة
وكأنك مسمعتوش
قرب عندنا قرب
قايس مرة وجرب
سلمنا يابقف دماغك
تتكيف ونجيب داغك
لما تروح تطوح
وإنت مفلس متسوح
ياخدوك ع التخشيبة
وتقابل سيد شيبة
تخضعله ياحلو وإلا
يعمل وياك القٍلة
شفت وصلت لفين
ياخرونج عشان نفسين
إرجع تاني لعقلك
دا شيطانك بيبحلق لك
حالف بالله يغويك
بعد مايغويك يحلق لك
بقلم طارق السيد