أه يابلد
يابلد لِيكى العَجَبْ
بين البلاد مَنكُوبَه
الظُلم فِيكى وجَبْ
والعدل صَار أُعجُوبَه
الحُزن عليكى انكتَبْ
أمّا الفَرْحَه أكذُوبَه
الدَمع صُوتُه غَلَبْ
والضحكَه مش مَكتُوبه
أخلاقنا كمان راحت
قالوا مش مطلوبه
صُورتِك لُونهَا بَاهِت
وكمان صَبَحِت مقلُوبه
نَاس ضَمَايرها ماتِتُ
ونَاس رُوحهَا مَسحُوبه
ونَاس فيكى تَاهِت
عَلَى أمرها مَغلُوبه
ناس بِتفرِش حَرِير
وناس فَرشِها طُوبه
ونَاس غطَاها الدَفَى
وناس غَطاها رطُوبه
ناس تِعِيش تِسرَق
فاكْرَه البلد سَبُّوبَه
وناس تِتعَب وتِعرَق
حِلمَها تِشترى أنبُوبه
بقلم / سيد عبدالوهاب
