بقلمي / محمد البنا
الشمس
إمبارح قبل النوم ما يدق الباب
اتنين أغراب
كنت لأول مرة بأشوفهم
سبحان الله
نفس النظرة ونفس العين
قمرين
على صفحة بحر
قلبي الخواف من بحر الليل
ولا عمرهُ إتعلم لحظة العوم
ماأعرفشي إزاي
ولا جت لهُ الجرؤة دهيا منين
نطيّت ولقيت
القلب وهو بيغرق
فرحان
بيزيد النبض ف قلب وريده
وف الشرايين
مجاديف الصبر رماها بعيد
ولا شيب ف الراس
ولا رعشة إيد
منعوه
من إنه يحب
كان حاسس إنه ف حالة عشق
مع إنهُ
ماحس ف لحظة ف عمره
بإنهُ ملاك
أو طير
كان له جناحات
بيطير
مع إنهُ
ما حس ف لحظة ف عمره
بإنه شيطان
إتمنى يموت
ف عيون حضنوه
وصحيت
ولقيت الشمس بتنقر ع الشباك
فتشت حنايا القلب بشوق
مالقيت أغراب .
