عقل الأيام
............
ولأني ب الم الحزن بيوت
وزهور وورود
ونخيل وشجر
الدمع بيبقى ف قلبي مطر
وينط نن العين غيامات
ولأني ف دنيا الحزن ب اقوم
ولأني بطعم الحزن ب ابات
الحلم يطرطش ف الدمعات
تنزل ع الأرض وترسم ضل
عقل الأيام ع الأرض اختل
وكتبني ف سطر عذاب وألام
وف سطر دموع
وف سطر وجع
الدمع سحاب ف القلب وقع
واتمدد ف الشرايين طعنات
مع كل شهيق
مع كل زفير
وف كل طريق حاطط إشارات
خللاني أشوف بعيون الشوف
كل الأيام ف الحزن اخوات
وما فيش علامات
تثبتلي بإن النور ح يبان
أو حتى تقوللي الجي أحلا
الجو مشبّر م الدمعات
والأرض من الدمعات وحلة
واتكتبت ع القدمين رحله
وطبيعي الخطوه ح تمشيها
أحلامي المهدومه ف قلبي
مش ح اقدر أبدا أبنيها
وابنيها ازاي وانا جسمي هزيل
من فعل الوجع اللي ف روحي
عصافير تغريدي خلاص ماتت
وانطلقت فيّا طيور نوحي
يا مداين على صرح جروحي
مش حِمل الحِمل
عقل الأيام ع الأرض اختل
د انا كنت ف لحظه جناين فُل
وبقيت صبّار
أشرب من بطن الأرض مرار
وأنز ف قلب الأرض مرار
والضي الهربان مش راضي
يبعتلي بصيصه من الأسوار
د انا كنت ف إيد الدنيا ب اعوم
دلوقتي ب اعوم عكس التيار
كل اللي ف عيني جميل انهار
كل الألوان صبحت ف حداد
الميّه دموع