إهداء من الزمن
================
وبصيت من شباك الزمن
على نسمات الماضى ولياليه
من فتحة من إهداء الزمن
وفيلم بتفرج لوحدى عليه
الشوارع والبيوت والناس
وميلادى واللى كان قبليه
وحبيبى اللى كان فى الغيب
وروحى حقيقى كانت دايبه فيه
وأصحابى وحكاياتهم وذكريات
وأفراح وأحزان مكتوبة فيه
تتغير الشوارع ونكبر معاها
ويكبر الإحساس والحب نلاقيه
على جزء كبير من حياتنا
ويفضل الحزن سايب علامة فيه
ونستحمل الحياة مع بعض
ونلاقى ذكرياتنا بدمنا مكتوبة فيه
شفت الطفولة والشباب
والطريق والناس اللى فاتونا فيه
ونفرح ونحزن وبعدين
ننسى الزمن واللى بيجرى فيه
خطاوى هنمشيها مع بعض
أومن غيربعض والمكتوب هنلاقيه
ومن شباك الزمن لقيت
السماح والود والحب أجمل حاجة فيه
يا ريتنى ما زعلت حد ولو
الماضى رجع لأحضنه وأبوس إيديه
سامحنى يا صاحبى أصل
اللى فات صعب تغيير حاجة فيه
عشان أنزل من شباك الزمن
والعمر اللى مايل أعدله وأبنيه
أشكرك يازمن كشفت لى
الصاحب والحبيب والوحش لازم أرميه
واللى غلطت فيه من زمن
مش ممكن أرجع تانى وأغلط فيه
العمر لسه طويل والزمن
مليان شبابيك لوعايز تشوف ماضيك فيه
=================================
أيمن طه
