سيد عبدالوهاب
أنا مين
عايش غَرِيب ف حكايه
والحِيره ساكْنَه جُوّايَا
عَمَّال ادَوّر على نفسِى
ونَفسِى مش عايشه معَايا
هُوّ انا ضَلْمَه ولاّ ضَىّ
هُوّ انا رايح ولاّ جَاّى
أنا مِين وإسمى إيه
هُوّ انا مَيّت ولاّ حَىّ
هُوّ انا جّد ولاّ خَيال
هُوّ انا رّد ولاّ سؤال
أنا كِلمه بَس صَعبَه
حرُوفها صَعْب انّها تِتقَال
يمكن أكُون ضِحكَه جميله
أو أكُون دَمعَه تِقِيله
جَايز أكُون رَغبه أكيده
أو أكون يَدُوب وسِيله
يمكن أكُون فِكرَه بِعِيده
فِكره هَربَانه ف قَصِيده
جايز تكون فكره قديمه
أو تِكُون فِكره جِدِيده
بقلم / سيد عبدالوهاب
