شطحاتي
عارفين الأتوبيس كارتر ....عارفينه
فاكرين الأتوبيس كارتر .....فاكرينه
في وسط الزحمة تلاقي اللحمة
مترطرطة قوي ع الجنبين
وديابة بشرية عيونها بتلمع
نازلين بص شمال ويمين
وإدين بتفتش في جيوب غيرها
أو في جناب ست الحلوين
وروايح هبة ترد الروح
من تحت الباط أو بيت اللوح
تهرب منها وتبعد عنها
تجري وراك لو فين ماتروح
واللي راكب على كتف الناس
واللي مركز والمنداس
والمتمرجح والمتطوّح
والكمسري إبن المحتاس
والمستعجل نفسه يروّح
مايعديه إبن المستلوح
واللي بعلو الصوت بتنوح
سرقوا البوك بتاعي ياناس
عارفين القطر المجري .....عارفينه
فاكرين القطر المجري ......فتكرينه
كان يطلع يجري وانا أجري وراه
أنط النطة أركب جواه
هو يصفر وانا أغنيله
لعمنا نجم البلي بلي باه
وف أي محطة بخفة قطة
أفط وأنط أخرج براه
عارفين المر الحنظل ...... عارفينه
مين ذاق المر الحنظل .......شاربينه
شربت أنا منه كاسات وكاسات
أشرب وأقول ياسلام شربات
غصبا عني ومش بإديا
إيد الظلم ظلم تقيلة عليا
وكل ماأصرخ أأأأه بتقوللي
أبوك السقا ياموجوع مات
لكن برضو عايش متهني
وهفضل أغني وأغني وأغني
إذا كتن ع الصبر أنا هفضل صابر
بس الصبر مايزهق مني
بقلم طارق السيد

ت