سامح لطف الله يكتب : دولة في آخر المحيط
صناديق كتيرة تترسم
ملفوفة في وسط العلم
وناس كتيرة زيِّنا
لابسة البدل لابسة العمم
بركان وفاير وسطهم
يرمي النيران يرمي الحمم
يختاروا من بينهم رئيس
يعدل حيطان الظلم مالت
ويدوس علي كل الألم
ينسف جبال متكوِّمة
راءات راءات وخراب ذمم
يعدل ضلوع اللي اتكسر
وأملها يطلع محترم
الدولة دي آخر المحيط
والكون بتاعها كون بسيط
والناس وماشية بزمبلك
ولا تحتكم ولا تمتلك
م الإيد يدوب ولبقها
لكن ما ضاعشي حقها
ولاعاد رئيس بيعيش لها
من يوم خروجك يا ملك
الأرض مليانة بكنوز
شعب وغني وازاي يعوز
في الفقر عايش ليه ؟ يجوز
وتشوف شباب زي العجوز
والضهر منه ينحني
لا شغلة ليه أو مشغلة
ع القهوة قاعد صهللة
م الجوزة بيشد النفس
والدم جوَّاه انحبس
وشاشات تقولك دا اتلبس
والبسمة ماتت م العبس
ضاعت شوارع البلد
مابين قهاوي بتتولد
وما بين كرامة بتنجلد
لاحد زارع زرعته
ولاحد فاهم صنعته
وف الكلام ما تكلفته
حريف وفاهم مهنته
قصر الكلام صارت زحام
وبطالة مالية الكون سخام
وسماسرة بتبيع الكلام
ولا حد عارف خطوته
كله اعتراض أيوة اعتراض
ع الفيس وعايشين ف افتراض
والدولة نازلة ف اقتراض
قراض بينهش ف القراض
وشيخ يقوللك لا اعتراض
مكتوب علينا بحكمته
قفلوا المصانع والورش
والرغي ف وداننا اتفرش
والعقل منّا واندوش
واللي اتفرس واللي اتكبس
هيموت يا عيني بحسرته
يا عم اصحي لدولتك
هتفيد بإيه كده قعدتك
لو حتى جه مليون رئيس ·
سامح لطف الله