شعر الأديبة : أسماء محمود الجلاد
زمام الوقت
استنى متقفلش الكتاب دلوقت
كتابى لسة فيه م الوقت ميت الف وقت
كتابى فيه سبع تلاف صفحة
لكنه منتهاش الوقت
كتابى مكنش بس زعيم ولا فارس ولاملاح
ولا فلاح ولاازميل
ولا شاعر ولا بنى ولامرضان يتمنى
ضياع الوقت
كتابى من ذاته طبيب ذاته يداوى جراحه بجراحه
ويغزل م الالم سكة
يفوت العمر والعلة يداويها الوقت
كتابى مهوش سطريين فى حدوته
ولا بناية بتغنى على التوتة
كتابى مهوش صفصافة شعرها فى النيل بتتوضى
وتركع فى جلال الركعة تقو ل يا رب
كتابى مش سحابة صيف ولا
يهده اختلاف الريح
يفيض النيل ولا يطمس معالمه السيل
وتمر الرياح عاتية مهتزش غصون الوقت
كتابى فيه بدال القصة
ميت قصة ومروا علية ميت صحبة
وميت مملوك وميت مالك
لكنه م الازل مالك زمام الوقت
كتابى فى الزمان ايوب وصبره ع العلل مقسوم
لكنه فى زحام العمر بيعافر وبيشاغب
بيخلق من خوابى الذل امجاده
ويترفع عن عداه يقولو ا ده مات
فى ذات اللحظة يقوم مارد
يغزل م الكفن توبه
ويلتحف بالريح تخاف الضلمة
فتنور ليالى الحُلك
