تاخد كام وتيجي مكاني ..؟! 

انا مش اناني .. 

انا عايزك بس مره تحس 

ازاي بعاني .. 

وازاي ف عز البرد واقف 

لحد ما احمرت وداني 

انا سبت ابني المريض .. 

و رحت بعيد وده كله ليه 

لجل ما ابنك كل عيد 

الأمان يحس بيه 

لجل سعادتك تلقي سعادتك 

لما تلاقيه 

رايح وجاي ومحدش يقوله

كاني وماني 

تاخد كام وتيجي مكاني ؟!

و كتير اوي نزلت دموعي .. 

والبرد قافش بين ضلوعي.. 

ولما ادور على أي لقمه.. 

أسد بيها بس جوعي 

عايش عشانك مش عشاني .. 

تاخد كام وتيجي مكاني ؟! 

لما افتكر ست الحبايب .. 

و قعدتي وسط القرايب .. 

وابويا لما قالي شوف .. 

يا تموت بطل يا تبقى خايب 

لو جيتلي اجازه تاني 

تاخد كام وتيجي مكاني ؟!

سيد صادق