حبة مطر
=========
و مداها دمعة عين بشر
متحجره
متسرسبة
من بين مكاليب القدر
حبة مطر
حالفة اليمين
لتجيلي بكرة و تمحي فكرة
و تسقسق الورد الحزين
متبسِّمة
و البخت كان طارح قليل
والنجم شاهد قصته
نبض قلبه كان عليل
دابت خيوطه في الغيوم
واتعلم القلب السكات
ممنوع تبوح
أو تمحي روح
لنبض عاش في الذكريات
والذكرى ليلة زفته
حالفه لتحضر دفنته
ترسم سوادها ف بدلته
والقلب مات
والليل خنيق
حتي الورود اتعلمت
رغم الجمال
الحال يضيق
و اللون بيقلب للسواد
و جمالها زال
لما تحضن ف التابوت
الحي تبعد خطوته
و الروح تموت
فوق الغصون
عصفور بيبني عشته
كان نفسه يمسح دمعته
في ليل يتيم
والقلب مرسوم لؤلؤة
زاينة الجبين
طب أنت مين
تابلوه جميل
شيفاك بتمسح دمعتك
ترجِف بخوف
والقلب مرمي ع الرصيف
مقلوب ربيعه ع الخريف
كل الكلام بيجرحك
حتي الوشوش قلبت وحوش
و الآهة بس تريحك
و الآهة بس تريحك
