وجع الرّوح
طفلين قعدو عا حجار البيت
ريشن وجع .. دمّن جرح مفتوح
تكيت عا كتفو بقصدها .. يا ريت
شويّة غفا تغسل عذاب جروح
بقلب العلم لقيت دفا للرّوح
زغيّر وعي بالكون عا بكّير
من دون أهل مسؤول عن إختو
فوق الحجارة مدمّرة يا زغير
عيونك شو صابن من وجع .. شفتو
عتبان عا ألله بنظرة لوم
زغيّر ما بانت ريشة جناحو
بعدو ما قِسْيِت رحلتو لِلعَوم
وبعدو ما نِشفِت دمعة جراحو
دخلك يا ألله وين عينك جيب
وليش تسمح للطّفولة تغيب
شمس عمرن عالقلب بتفوت
ليش تسمح تنتهي البيوت
كمشة تراب بعجنة التّعذيب
منى رفيق بولس
لبنان
