بيتي
هشلان بالحقلة ورا الشّجرات
بيتي ال كتب للّيل خبريّات
بيوعا عا شقّ الفجر .. وعتابو
تغزل مع الحسّون غنّيّات
جوّا الحجار المجد عا بابو
سطّر حكايا كتير جنّيّات
سهروا سوا وبالليل بوّابو
قفّل على الأسرار بوّابات
وجاب العطر .. عالخابية جابو
من الورد عبّا جوانح فراشات
وردّ القلب سكران ل حبابو
وخبّا ورا العتمة حكي مرايات
ياما عا كتفو شابت الغيمات
ومن كتر شوقا نزلت الدّمعات
وصرخت وقالت بعتم كانون
وين الدّفا بجمرة الحطبات ؟
دخلك افتحلي هالقلب مجنون
ياما عا حيطانك شقع صرخات
وبالصيف لمّا خيوط شَعري تكون
رقيقة لطيفة ملمس وآهات
بمرق لعندك حاملي قانون
أوتار روحو توزّع النغمات
ونسهر سوا تا يختلج مكنون
جُوّا الصّدر دقّات قلب تصون
شبابيكك من عيون هالنّجمات
منى رفيق بولس
