(مجلة كل الخواطر) بلاقى نفسى -------- بقلم الشاعر\ مدحت عطية

بلاقى نفسى
للشاعر مدحت عطية
مش كتير
بنلاقى نفسينا
مع إنها
جوانا .. وفينا
مش بنعرف
إذا كانت هناك
ولا وسطينا
إذا كانت فرحانه
ولا حزينه
أنا بلاقى نفسى
لما لسانى
يغرف من قلبى
لما أقول
الـ فى نِفْسى
بلاقى نَفْسى
لما تقومى ياأمى
لما تشبى
أحضنك
أخد نَفَسى
بلاقى نَفْسى
فى السما ولونها
فى ميه البحر
وجنونها
فى إلـ يفدى
بلاده .. ما يخونها
فى إلـ يفتح
دراعه لحبيبته
ويصونها
بلاقى نفسى
فى السفر
فى طير
بنى عشه
على شجر
فى الحياه
الـ فى حبة مطر
فى الصوت
الـ طالع من الحجر
بلاقى نفسى
فى شر ما لوش آثر
فى كره ناشف
فى الصدور
وقلبه إتعصر
فى قومه ضعيف
فى حق .. بينتصر
فى ظلم بيدارى
وينكسر
بلاقى نفسى
فى حروف
الكلمه .. الحلوه
فى لحن يسرقنى
فى غنوه
بلقاها
لما أمد إيدى
لحد فى دروة
بلقاها
مع ربى
فى خلوة