(مجلة كل الخواطر) يا عمى الموظف----بقلم الشاعر \طه ابراهيم

ياعمي الموظف
@@@@@
ياعمي الموظف ياعمي المدير
يا شايل همومنا بذمه وضمير
يا فاهم وعاقل وعامل خبير
جمايلك يا باشا علينا كتير
تحب الغلابه وقلبك كبير
تحل المشاكل وتحمي الفقير
وعارف ظروفنا وسرك ف بير
ف عهدك يا باشا لبسنا الحرير
ياعمي الموظف ياعمي المدير
يا شايل همومنا بذمه وضمير
@@@@@
وشقه ف أوضه وأوضه سرير
وشباك موصل لحد الحمير
وخلتي أم فكري بتشكر كتير
وطلبه المساعده ف قله وزير
وجوزها اللي عايز وظيفة خفير
بيحلم وحلم الغلابه صغِير
بيحلم بعشه وفيها البعير
ويقدر يعشي البهايم شعير
ونومه مريحه ويشبع شخير
ياعمي الموظف ياعمي المدير
يا شايل همومنا بذمه وضمير
@@@@@
وعمي عليوه شحاته الضرير
مصمم يجيلك بشنطة فطير
هتاكل صوبعك وعقلك يطير
وتأمر جنابك بمطلب أخير
بهدمه ولقمه وحبة حصير
ومطرح صغير بطينه وجير
قناوي ابن عمي موظف أجير
واخويا الصغير واخويا الكبير
وكل القبيله بتشكر كتير
وصوتهم مسجل ف قلب الاثير
ياعمي الموظف ياعمي المدير
يا شايل همومنا بذمه وضمير
@@@@@
بقلم / طه إبراهيم