جارى التحميل
استخدم زر ESC أو رجوع للعودة
(( أنا و فاسى ))
====
أنا و فاسى .. بكف أسمر
حفرتى فيه علامة نصر
نقوم من بدرى و نشمر
يحيينا أدان الفجر
يصلى بنا نهار أخضر
يدوب نكتب به أول سطر
بيد المولى .. أنا ها قدر
ولو غموسى مش و صبر
====
و يقدر دراعى النحيل
وعرقى اللى إتبدر حَبْ
يهز شواشى النخيل
ينبت تمر جوا القلب
وساقيتى تبوسَك يَا نِيل
ونرويها .. تِطرَحَك حُب
ونحصُدها بشوقى يا ليل
عيون حبيبى كام أردب
====
من حر الشمس أو مطره
شال عزك يصون راسى
و فـ ضل جميزتك الخضرا
أغنى .. بقلبى و إحساسى
و شاى لمَه .. بقى سهره
يجمع عزوتى و ناسى
و كما اليوم يجى بكره
مربوط بيكى .. ودا أساسى
====
يا ست الكل يا صابره
شبهك تمام أنا .. صابر
تصير زينه تكون غابره
على أيامى .. أنا قادر
يا أرض الأنبياء الطاهره
زرعتك قطن بمشَاعر
وما بين الغلب و القدره
فلاح .. وبى إبنى بيتفاخر
====
#تحية_لفلاحى_مصر
