مجلة كل الخواطر:: فاتحة بابك :: " بقلم الشاعر الكبيرالمبدع أ / وحيد راغب

فاتحة بابك 
للى خيب ف الهوى 
على طول جنابك 
واللى من أجل انسياقه 
ساب هويتك 
كان ف بيتك 
تحت mask وقوس قزح 
لما سيبتى الحب ليه 
عنك أزح 
أنت بالنسبة لسعادته 
كاس كبير مليان بخير 
بيعب فيه 
لما قمت بثورة واضحة 
كان بلخبط ف الميدان 
مرة ويسكى 
ومرة بتحرش لبنته 
ومرة باخرم ف الودان 
كان جعان للهدم فيكى 
يتلاقيكى ساجدة ليه 
يعنى بيه 
يستحمى بالكالونيه 
وبالفقير 
الأهم يكون ف كرسى 
وعرش مأرب 
والقصور 
بتشر خارج ويا داخل 
والثغور 
عمالة تعزف بالفكاكة والنظاكة 
والعكاكة والنخير 
كل واحد ورك بطة 
ف إيده شنطة 
محملة نزف ونشور 
ربكة دبكة ورقص بلدى 
أو بصرة 
فالمعرة بين عنيهم 
كعب عالى 
والنجوم خزيانة منهم ف العلالى 
شكل حلو وملو دلو 
ضميره ميت 
ناس تخليهم حسالة 
وناس تحملهم بقالة 
الجوع واخدهم 
للزبالة 
أصل جوا الصدر ضلمة 
معششة خفافيش كتير 
والحمير عمالة تنهق 
لما خدمها الشعير 
كان لا زمنا نشيل أذاهم 
مش رضاهم 
واستعدنا البير ف ساعة 
فالشعوب لما ياخدها 
النور وتجرى 
يستخبى الديب ف جحره 
ساعة يخرج وقت غفلة 
يعض طفلة 
وساعة ينسف شاب راكع 
للإله
من غباه 
لو صوابعه مش ف طاعته 
يمحى فيها 
هو فرده 
يعيش لوحده 
مش مهم الغير يعيش 
الوطن ف ألف داهية 
المهم الجبنة تبقى 
ف يوم أريش
والزحام بيطل منه 
بالرصاص 
جوا توكتوك أو 
بخارية قصاص
فهمه راوندى النزوع
أو لرازى 
المهم الدم ينزف 
للتعازى 
نسف أم ف موت ولدها 
أو ف زوجة الظلم كادها 
لما يتم جوا منها ألف ضحكة 
وكوم عيال 
الربابة اليوم بتبكى 
والجبال 
مخنوقة منهم 
الهوية مش مهم 
المهم يكون سعادته 
الكرسى ليه 
والعرش ليه 
والجاتوه قدام سعادته 
والعصير 
ألف بير يكون لغيره 
مش مهم 
المهم يكون بيحلم 
أو بيقطف عين لوطنه 
اللى كان بيقول دا وطنى 
مش صحيح 
هو زمنى 
مش مهم النشأة فين 
أو منين 
الدنيا واسعة للى زيه 
كل زى يبقى زيه 
والنهاية العرش ليه
والجاتوه ويا العصير
الشاعر وحيد راغب عضو اتحاد كتاب مصر