مجلة كل الخواطر:: ونفسي أفوق :: بقلم المبدع الراقي أ / وحيد راغب

ونفسى أفوق
حكايتى إنى موجوع
بنار العشق
أطفى جذوته فيه
فيعشقنى
ويرسلنى على جناحه لباب اللوق
أشوف الناس عيون سارحة
وبصة لفوق
فتوهمنى بإن الشمس مش طالعة
وإن ميدانا متاخد
ومش مرزوق
وإن الفصحى مش فصحى
وإن الروح بقت جارحة
ومش طارحة لنا أبدا
علينا شروق
وإن الدم ف الآخرة
طيور هايمة بحرية
ولون أخضر
ملوش ف الدنيا مين تمن
ومين قدر
صور نعشقها ف قلوبنا
نعريها فتسبقنا
بورق التوت
محوطها خيوط دايبة
كلام ممصوص بلا فايدة
ونار قايدة
ف أم وزوجة وعيالها
وبنت بنوت
أنا واصل لغيبوبة
خيال جامح بعدى الآهة
والكهنوت
ونفسى أفوق
وامد كفوفى تلمسنى
أكون عايش
واحس حروفى مش مكتومة
ف ضلوعى
وإنى بقيت ومن فترة
على الهامش
رصيف تسعة مخاض أمى
وست بنات
وأب بيجرى فى سباقه
وميت خطوة على الآهات
ف سجن اللقمة والحيرة
ونسوة كبيرة
واحلامه بيحلمها
مع الأموات
طوفان الزق لم يجدى
ولا التأشيرة للخواجات
سيول الدمع عشقانى
بتزرع فيه بركانها
تلت سنوات
الشاعر وحيد راغب عضو اتحاد كتاب مصر