مجلة كل الخواطر .. [ أحلامي بدأت تتحقق ].. للشاعر القدير .أ / أشرف سعد

/ أحلامي بدأت تتحقق /
قالي في الشغل هنتعشي
وهنشرب شاي وهنتمشي
وانا قلبي رهيف يا جماعة
قصد الممبار بقي والفشه ...
روحت على بيتي اوام
ولبست هدومي يا سلام
في اليقظه يرسمها خيالى
انا طاير ومعايا حمام ...
وخرجت وانا كلي حماس
ما الفاس وقعت في الراس
أجرى واتكعبل وأقوم
واستغرب مش شايف ناس ...
انا شايف اطباق وصواني
ومعالق بتعزف ألحانى
والشربه أنا بغرق فيها
والضاني آآآآه ياه من الضانى ...
خبطت الباب وفتح لي
ابنه الواد مالك وشرح لي
أبويه هيتأخر حبه
عن اذنك عمو تسمح لي ...
وقعدت اضربها اخماس
واسداس توجع في الراس
وبطني من جوعها خلاص
هتفضحني وانا واد حساس ...
طولت الغيبه يا مروان
لأ منك انا كده زعلان
طيب حتي ابعتلي حمامه
أو حتي بعض السمان ...
وفي لحظة صمت وتفكير
وثواني وانا قلبي يطير
بيقولي اتفضل يا حبيبي
جايب لك لحمه وفطير ...
وشوفت فراخ وكوارع
وقلبي من الفرحه شوارع
أحلامي بدأت تتحقق
قبلها عقلي كان ضايع ...
شمرنا ايدينا وسمينا
وأكلنا الكارع و الفرخه
والشربه كمان بتدفينا
وعيونا بان فيها الفرحه ...
وثواني وبدأ البركان
والمعده في حالة هيجان
بتقول الرحمه حرام
كفايه عليا يا انسان ...
ودموعي نزلت طواعيه
جابوا لي حمامه محشيه
الوقت عدا خلاص
وداع يا أحلي صانيه ...
شربنا الشاي وتنحنا
وقفلنا الباب وفتحنا
مش عارف داخل أو خارج
مش عارف جينا أو روحنا ...
أشرف سعد