السـلام عليكم ورحمة الله وبركاته

بدايه لاخواتنا الخريجين الجدد كان لازم نبدأ ليهم بموضوع شامل عن البداية فى عالم المحاسبة وازاى تقدر تدخل مجالك اللى درسته وتتميز فيه وعلشان كده هبدأ معاكم من اول مرحلة من وقت تخرجك من الكلية .


كتير مننا بيفكر لكونه طول الكليه بينجح بالعافية او بتقدير مقبول المتين انه هوا كده فاشل ولا يصلح لانه يكون محاسب بس انا احب اقول لكل اخواتنا الخريجين الجدد ان المحاسبه هي فن وهواية لما تدخل مجالها هتحس باستمتاع ورغبه فى تعلم المزيد لكن برده اتخرجت وقررت تشتغل فى مجالك وبتفكر تبدأ منين الكلام ده اخد منى لما كنت فى موقفكم كده وقت حوالى اربع شهور تقريبا من البحث والتدوير فى كل مايتعلق بالمهنة وقريت عنها كتير اللى شجعنى انى ابدأ حياتى المهنية وحبيت انقلكم خلاصه التجربة فى اطار دليل لحديثي التخرج .

اولا احب اوضحلكم دورة حياة المحاسب ودى نقلتها لكم من موضوع زميل :

اولا

1- مرحله البدايه
من سن 22:24

ودي مرحله التخبط
بمجرد ما الشاب يتخرج
بيشوف جيشه وبيشتغل في شركه والتانيه الخ
ويبدا يستقر في شركه

2- مرحله النمو
من سن 24:35

ودي المرحله العمريه اللي
المحاسب بيحاول يبني قاعدة علميه وعمليه تؤهله لتولي منصب اداري اعلي في اسرع وقت

ودي يتنقسم ل3 مراحل فرعيه

من سن24:27
بيتولي الشاب فيها منصب محاسب عادي

من سن 27:30
منصب محاسب اول فرئيس حسابات

من سن 30:35
منصب مدير مالي شركه ما

من 35:45

مدير مالي واداري لمجموعه شركات


ملحوظه
*الارقام الوارد ارقام افتراضيه قد تطول او تقصر حسب الشخص نفسه


يعد ظهور النتيجة باذن الله بيبدأ الواحد فينا يفكر فى الجزء التالي وهوا المرحله المهنية وبداية حياته العملية .

ويجي دور التأهيل

اول خطوه فى مجال التأهيل لانك تبقى محاسب هو انك تعمل مراجعه بسيطه للى درسته ودي بتبقى عن طريقين
الطريق الاول: انك تاخد كورس محاسبى لحديث التخرج بيرجعك للمحاسبة وبيذكرك باللى درسته وبيعتبر تأهيل

الطريق التانى : انك تبدأ بنفسك تذاكر مره تانيه او تقرأ بتركيز الكتب اللى هذكرهالك دى

• كتاب مبادئ المحاسبة المالية 1
• كتاب مبادئ المحاسبة الماليه 2

وطبعا قراءه بتركيز ومتعتمدش على ملخص لان لازم تتعود ع القرايه لان مهنتنا كل يوم فيها جديد وكتب ومراجع فلازم تعود نفسك على القرايه وان كنت انا فى بدايتى كنت مفكرها صعبه بس هيا حاجه مسليه جدا وبسيطة .

قرأنا الكتابين دول وربنا كرمنا وخلصناهم ايه الخطوة اللى بعد كده
اقولكم ياشباب هو احنا برده درسنا المحاسبة الماليه فى سنه اولى باللغه الانجليزية يبقى هدفنا اللى جاي اننا نقرأ الكتاب الخاص

• بالدراسات فى المحاسبة المالية باللغة الانجليزية

وده فائدته انه هيرجعك لانك تتذكر المصطلحات المحاسبية اللى باللغه الانجليزية وده فى حد ذاته شئ مفيد جدا وهتحتاجه

بعد ما نخلص قراءه الكتب دى هيبقى عندنا شوق لاننا نمارس المهنه ومهما قرينا الشوق والفضول بداخلنا للممارسة العلمية هيفضل يزيد .

بعد الخطوة دى اقدر اقولك انت تقدر تعد السيرة الذاتية بتاعتك وتبدا تدور على مكان عمل للالتحاق بيه
وهنا ليك طريقين

• الطريق الاول : هو انك تلتحق بمكتب محاسبة
• الطريق الثاني : هو الالتحاق بشركة للعمل كمحاسب مالي

انا شخصيا افضل الطريق الاول رغم انه صعب جدا بس الاستفاده منه عظيمه جدا وسواء ده او ده فالدنيا مش هتقف عند الحد ده لا ياجميل انتا لازم تطور نفسك وفاكر نصحتك فوق قولتلك ايه قولتلك لازم تقرأ
هتقولى وهوا لسه فى قراية منا قريت تلت كتب وعملت
هقولك ايوة فى قراءه تبدا تدخل .

• المحاسبة فى شركات الاشخاص
• المحاسبة فى شركات الاموال
• محاسبة التكاليف
• المحاسبة الضريبية
• مراجعه الحسابات

ودول تقراهم اثناء عملك هيفدوك جدا خصوصا لو فى مكتب محاسبة

طيب كده ابقى انا محاسب كويس لما اخلص الكتب دى ؟


الكتب دى ليها دور كبير فى حياتك انها بتديك المعلومه اللى بتبنى عليها اللى بتتعلمه فى مجال عملك سواء مكتب محاسبة او محاسب مالى بشركة




بس هرجع واقولك انك ادامك منذ التخرج لحد سن 24 فانت بتكتسب خبرات لحين الوصول للمرحله التالية وهيا مرحله بدايه النضج واللى فيها بتستقر فى حياتك المهنية فى شركة او مكان محترم وتبدا تترقى فيه وتواصل عملك فيه.

وممكن تتطور من نفسك لمزيد من التميز بانك تحصل على احد الشهادات المهنية

مثل
cma

وطبعا بعض الدورات التدريبية مفيدة جدا فى حياتك كمحاسب لانها بتزيد من خبراتك العلمية واللى بتطبقها من خلال عملك وبتنعكس على مستوي اداء اعلى


وبعد كده هتيجي هنا وتقولى ايه الخطوة التالية ليا ؟؟

هقولك طبيعي انت لما توصل لكده زى ماقالنا زملائنا اللى اقدم مننا وقتها هتقدر تحط مسارك وهدفك
وطبعا اى استفسارات انا موجود وان شاء الله الموضوع يكون فى تحديث مستمر فى الفتره الجاية



ارجو اكون افادتكم ولو بشئ بسيط والله ولى التوفيق

منقول