تخـتار   تمـوت   فيا  ولا   تمـوت    شهـيد
هي  طلقه   طايشه    ونعزي     ف الفقيد
امضي وابصم ياروحي خلي  قلبك  حديد
صدقني  كتر  الكلام  لاهيغني  ولا  هيفيد
مش   قلت   بتعشقني   وبتتمني   تضمني
وعيونك    دوبتني      ورمشك      شـدني
وعزفت  ف حبي  احلي   واجمل     نشيد
دلوقتي  ليه  ياروحي  مش حساك  سعيد
ايه  اللي   مخوفك  ايه     اللي   ملخبطك
كلها    ربع     ساعه      والمأذون   يظبطك
ويبقي  معاك  عروسه حقيقي  مش  تقليد
وحياتي عندك  ياروحي  امضي  متتكلمش
اسمع كلامي ياقلبي الرصاص  مبيتفاهمش
وانا  قــد   كلامي   بجـد     مش     تهـديد
امضي  قبل  ماخلي  الطلقه   تسلم   اختها
وباباك يبكي عليك  ومامتك تشد   فشعرها
ولا  ناسي  انك   دلوعتها    وابنها   الوحيد
امضي وحياتي عندك ف هدوء من   سكات
لحسن لاتطول حاضر ولاماضي  ولاذكريات
امضي  بقي  لفجـر  قلبك    وعقلك   العنيد
اوعي   حد  يوزك   وتبص   لواحده   غيري
ساعتها ماتندمش عاللي هيحصلك  ياطيري
هجيبك هجيبك وحسابك   هيكون    شديد
يعني  مفيش   سهر   ولا  لف    ولا    دوران
ولاتخرج لوحدك ولا تقف مع  بنت  الجيران
لا اخلي الخـوف يطرح بين ضلوعك عناقيد
بقلمي// صابر الطوخى