•• حال الزمان ••
؛؛؛ أشعار ؛؛؛
عمادالدين العيطة
ياقلبى مين غيرك
خلاك حزين
ليه سبتهم يغيروك
بعد السنين
كانوا يحسدوك على
فرحتك .. ولما تفرح
ترجع الفرحة دموع
والدمعة ف العين بتجرح
وعشان مالسة بتحبهم
تقيد لهم تانى الشموع
وهما تانى يسهروك
وسط الدموع
إنسى اللى باعك وزعلك
وإمحى جراح راح تقتلك
بين الضلوع
أه يانا .. ياموجوع
ياقلبى ياما م السنين
نزلت دموع
وياما غابت شمسنا
من غير رجوع
تعرف تقولى إيه الجديد
مكتوب عليك الوفا
وتقيد عشانهم شموع
وهما قلوبهم حديد
قاسية قساوة الشتا
من غير دفا ..وإنت عنيد
إيه الجديد غير الجفا
وجراح تزيد
والعتاب مبقاش يفيد
خلاص ياقلبى بقيت وحيد
هو دا حال الزمان
تحب تلقى الحب خان
هو دا حال الزمان
مالوش أمان
ماكفاية وإنسى اللى كان
إنسى اللى فات
ياما زرعنا الحب ..
بس الورد مات
ياما أهات فى القلب
باتت من سكات
وياريتها تابت
وياريت الحب ساب
الباب موارب
لكن .. خلاص ..
الفرح غاب بعد الحبايب
