منقوع القرف

***

بـاستخبي فى ربع توبي

ياللي كان عزك ِ ساترني

طـهريني  مـن ذنـوبي

ماتسيبيش حـد يعايرني

لوكرهتي ف يوم وجودي

فــكـي   قـيـدي

هـو فـيه غـيرك آسرني؟

***

ملاية قطن مهرية

وحتة خيش

-

وحلة محشي

مسقية

مرق برطيش

-

وموجة حزن

ف ضلوعي

كتايب جيش

-

انا مخنوق ياخلق الله

انا مخلوق ونفسي أعيش

-

ناديت وصرخت والموتى

مابيردوش

هنت عليكِ يا امايا؟

ماسمعتنيش

-

انا شاعرحياته كلام

وهجص كتير

ولعب..و طيش

-

لكن عاشق تراب أرضك

فمن حضنك  ماتحرمنيش

-

يعدي الإمعه جانبي

جبل عالي

وفوقه الريش

-

تطيري بيه

وهو بيدّعي حبك

وانا العاشق   ماتلتفتيش!؟

-

ياريتني أموت

عشان ترضي

وهو يعيش

-

أموت يا امي

مايهمش

أجوع ..أتْعرّىَ

ماتْدقيش

-

لكن غُصه هنا في حلقي

واقفه حالفه

ماتسيبنيش

-

ودا.. لأني

رصيدي

مفيش

-

وبيتي بوص

وحبة هيش

وقُلت أعيش

عشان تمشي

لكن...والله

ما بتمشيش

===

الشاعر: عادل غتوري