عزاء الجرح

*     *     *     *     *     *     *     *

عزاء الجرح مش هاخده

فى قلبى الجرح فيه الروح

وجرح القلب انا قده

مادام القلب فيه الروح

وتارى ف يوم أكيد هاخده

من الآسي منين ما يروح

ومش هبكى بالدموع والدم

ولا هشكى بجرحى واتألم

ومهما الجرح ينزف دم

ولو فى القلب هايعلم

هداوى جرحى بإديه

ودارى دمعى فى عنيه

ولو زاد الألم بيه

لا هصرخ يوم ولا اتألم

 

لا اسلم للعذاب أمرى

ولا اندم ع اللى فات عمرى

حياتى بعرضها وطولها

هاعيشها أكيد واكملها

وقابل ناس تفرحنى

وقابل ناس تجرحنى

وناس في الفرح تفرحلى

وناس فى الجرح تتألم

 

رياح اليأس هتعدى

وجرحى ودمعتى ف خدى

هتدبل يوم وهنساها

ويطرح فى الربيع وردى

دى دنيا ومنها نتعلم

وانا من جرحى هتعلم

لا اسلم قلبى بالساهل

واسلم للى يستاهل

حياتى وعمرى يوم ما اندم

*   *   *   *   *   *   *   *   *

عزاء الجرح

كلمات الشاعر

ابراهيم محمد