شركات كتير بقت تعمل مقابلة مع المتقدمين لوظيفة معينة عن طريق التليفون قبل مقابلة العمل التقليدية، عشان يقللوا عدد اللي هيتعملهم مقابلة شخصية ويوفروا وقت…المكالمة دي هي اللي هتحدد انت هتكمل وهيتعملك مقابلة العمل ولا لأ.. عشان كده لازم تستغل وقت المكالمة المحدود بأفضل طريقة.
مهم أوي إن لما يجيلك مقابلة عمل على التليفون تكون مستعد ولو الوقت مش مناسب بالنسبة لك ممكن تطلب ان المقابلة تتم في وقت ثاني.
فيه حاجات ممكن تعملها عشان تنجح في مكالمة مقابلة عمل:
قبل المقابلة:
- خليك مستعد كأنها مقابلة عمل عادية، ادخل على الموقع الالكتروني للشركة قبل المقابلة واعرف كل المعلومات الاساسية عنها.
- اعرف تفاصيل الوظيفة اللي انت مقدملها، عشان تقدر تتكلم على اساس انك الشخص المناسب للوظيفة من خلال خبراتك أو مهاراتك أو دراستك.
- جهز ملاحظات مختصرة للمعلومات المهمة اللي ممكن تحتاجها.
- جهز إجابات للأسئلة اللي انت متوقع انك تتسألها…طبعا مش مطلوب انك تقرا من الورق لكن استخدم الملاحظات دي في انها تفكرك بالنقط اللي انت عايز تتكلم فيها.
- خلي قدامك نسخة من سيرتك الذاتية…عشان تبقى جاهزة لو احتاجتها.
- جهز ورقة وقلم عشان تكتب اي ملاحظات أو معلومات.
أثناء المقابلة:
- اقعد في مكان هادي عشان مفيش أي أصوات تقاطع المقابلة أو تقلل من تركيزك.
- استخدم خط أرضي واقفل خاصية الانتظار..لإن اي مقاطعة للمقابلة بسبب مكالمة تانية تجيلك في نفس الوقت ممكن تزود من التوتر وانت بتتكلم.
- البس رسمي: لان ده هيساعدك نفسيا انك تدخل في جو المقابلة وهيبقى اسلوبك في الكلام رسمي أكتر.
- اتكلم بنبرة صوت واضحة…وياريت تبتسم وانت بتتكلم عشان ده بيدي انطباع إيجابي للي بيتكلم معاك.
- متقاطعش اللي بيكلمك أبدا… استنى لحد ما يخلص كلامه ورد بعدها.
- يفضل انك متستخدمش أي كلمات سلبية زي مقدرش أو معرفش لان الموظف المفروض انه يقدم حلول لأي مشاكل.
- حضر اسئلة تسألها في آخر المكالمة…لإن لما بيبقى عندك أسئلة بيبان انك مهتم بالوظيفة…ممكن تسأل عن الخطوة اللي بعد مقابلة التليفون أو عن تفاصيل أكتر عن الوظيفة.
بعد المقابلة:
- ممكن تبعت ايميل تشكر فيه الموظف اللي كلمك وتشرح فيه ليه انت مهتم بالوظيفة وده هيبين انك مهتم فعلا بالوظيفة.
بس عايزه انبه على حاجه
اولا موضوع اللبس الرسمى ده لأن ساعات بيكون متحدد وقت للمكالمه خصوصا لو هى من خارج البلد وهنا بنقول لو نفع تلبس رسمى لأنك هايكون عندك ايحاء بأنك فى مقابله رسميه وان قاعد قدام
الانترفيو
واحيانا بتكون مقابله على الاسكاى بى وطبعا سعتها ده مقابله كأنها فيس تو فيس هنا بيبقى لازم لبس رسمى لو فى استخدام كاميرا
اما الابتسامه فده بيدى ايحاء للى انت بتكلمه وطبعا هاتقولى هو شايفنى هاقولك ان البتسامه بتنعكس على اسلوبك وكلامك كأنه شايفك بالفعل
واتمنى التوفيق للجميع يارب
