نبدأ الاول في عجينة الكانيلوني
نفس مقادير عجينة الكريب
1 كوب دقيق
1 كوب لبن
1 بيضة
ملح و فلفل
و نضربهم كلهم مع بعض في الخلاط علشان مايكونش في حاجة مكلكعه
و في طاسه تيفال صغيرة نمسحها بشوية زيت
و بالكبشة ننزل فيها من العجين مقدار ما يملاء قعر الطاسه
و لما تبدأ الجوانب في الارتفاع
نقلبها علي الوجه الاخر
ولما يبدأ يتلون هو الاخر نشيله في طبق
و هكذا حتي تنتهي الكمية
الحشوات بأه
عندنا الحشوة العادية اللي هي
حشوة اللحم المفروم
(لحم مفروم معصج عادي)
في طاسة بنبشر بصلة كبيرة خشن و نحط عليها شوية زيت
و نقلب لحد ما البصل يذبل
و بعدين نحط اللحم المفروم
(نصف كيلو)
و نقلب كويس علشان اللحم ما يتكتلش
و نهدي النار و نسيبها لحد ماا اللحم المفروم يستوي و يتعصج
و ممكن بعد ما الحم يستوي نبشر عليه جزر بيدي طعم كويس
و نحشي بيه الكانيلوني و نلفه
ممكن نحشي بلحم مفروم و سبانخ
(طعمها جميل جدا و صحي للاطفال)
بنحط في طاسة فيها زيت ساخن بصلة كبيرة مقطعة مكعبات صغير
(مفرومة خشن)
و عليها 3 فصوص ثوم مهروسين
و نقلب و لما يذبل نحط اللحم و نقلب
عند مرحلة ان اللحم اصبح لونه بني
(قبل ما يتعصج)
نحط ملعقة كبيرة صلصة طماطم
و بعدين بنحط السبانخ اللي بنكون محضرينها كالاتي:
نغسل السبانخ كويس جدا و بعدين نحطها في حلة علي النار و عليها شوية ماية قليلين جدا لانها بتنزل ماية و شوية ملح علشان تحافظ علي لونها
و نغطيها و نسيبها لحد ما تذبل
اول ما نلاحظ انها زبلت نشيلها علي طول و نحطها مباشرة في ماية ساقعة برضه علشان تحافظ علي لونها
و بعدين نمسكها مع بعض و نعصرها بادينا كويس اوي و بعدين نقطعها شرايح رفيعة بالسكين
و نحط الشرايح ديه علي اللحم المفروم
و نقلب كويس وندوق علشان لو محتاج ملح ولا حاجة
و نسيبها شوي كمان علشان السبانخ تلحق تتجانس
و بعدين نشيلها من علي النار و نسيبها تبرد شوي
و نضيف 150 جرام جبن ريكوتا و 3 ملاعق كبيرة جبن بارميزان مبشورة
(انا ماكنش عندي الاتنين و حطين كريم تشيز و جبن رومي مبشور و مشي الحال)(طبعا مش نفس الطعم)
و نقلب كويس
و بعدين نحط بيضة كبيرة و نقلب كويس
و ندوق علشان لو محتاجة ملح و فلفل
و بعدين نحشي بيها الكانيلوني و قبل ما نقفل نرش رشة جبن بارميزان
و بعدين نلف الكانيلوني
ممكن كمان نحشي بالفراخ
نسلق الفراخ حتي النضج و بعدين نقطعها مكعبات صغيرة(2 صدر كبير)
و نحط عليهم نصف ربطة اوراق جرجير مفرومة خشن
و شوية ريحان اخضر
(ان وجد)
و ربع كوب زيتون اسود مفروم خشن
(مكعبات صغيرة)
و كوب جبن مبشور متنوعة
(ممكن نوع واحد لومافيش)
و ثلث كوب فريش كريم
(ممكن بتاعة جهينة لو مالاقيتيش الفريش)
و 3 ملاعق كبيرة زيت زيتون
(او زيت ذرة)
و ملح و فلفل
و نخلط الخليط ببعض كويس جدا و هو ده الحشو بتاعنا
نحشي بيه الكانيلوني
و في كمان حشوة الفراخ بالمشروم
بصلة كبيرة مقطعة مكعبات صغيرة جدا
(مفروم خشن)
نشوحها في شوية زيت علي النار و عليها ملح و فلفل حتي تذبل
و بعدين نحط الماشروم المقطع شرائح و نشوح مع البصل حتي يصبح لونه بني شوي
و بعدين احط الفراخ المقطعة مكعبات صغيرة
(مستوية)
و اقلب كويس حتي تاخذ لون البصل و المشروم
وممكن احط زيتون للي عايز طعم حادق
و قلبي شوي كمان علشان الزيتون يتجانس كويس مع الخليط
و اشيلها من علي النار و اسيبها تبرد شوي
و بعدين احط نصف علبة قشطة
و شوية كسبرة مفرومة خشن
و اقلب
و هو ده الحشو
و ممكن نحشيها بحشوة الفراخ بالسبانخ
4 كوبايات صدور فراخ مستوية و مقطعة مكعبات صغيرة
2 علبة كريم تشيز
(مقدار نصف كيلو)
تقريبا نصف كيلو سبانخ جاهزة و مقطعة شرائح
كوب جبن موزريلا
نصف كوب بقصماط مبهر
(العيش الفينو الناشف نطحنه في المطحنة و نتبله بالملح و الفلفل و ممكن نحط عليه ملعقة صغير باربيكا و مكن شطة كمان و ملعقة كبيرة جبن بارميزان مطحون او جبن رومي مبشور)
و ملح و فلفل
و نقلب الخليط كويس اوي مع بعض
و كده عندنا حشوة جاهزة
نحشي بيها الكانيلوني
و في حشوة السبانخ بالجبن الريكوتا
(معلش بأه الجبن الريكوتا غالية شوي )
نصف كيلو جبن ريكوتا
(500 جرام)
ربع كيلو سبانخ مجهزة و مقطعة(250 جرام)(شرحنا ازاي نجهزها فوق)
بيضة كبيرة
كوب جبن بارميزان
و نخلط الريكوتا و السبانخ و البيض مع بعض كويس
و نحشي بيهم الكانيلوني
(ممكن نعكس المقادير بين الريكوتا و السبانخ )
و شكلها هيكون كده
و علي وجه الصينية نرش كوب البارميزان فوق الصلصة
و في حشوة كمان بالسلامون المدخن
باكت سلامون مدخن
نصف ربطة شبت مفروم خشن
300 جرام جبن ريكوتا
بنقطع السلامون قطع صغيرة و نخلطها بباقي المقادير
و كده عندنا الحشو جاهز
طبعا احنا ممكن نبدع براحتنا بالحشوات علي حسب المتاح عندنا
انا جبتلك كام حشوة مشهورة
و ممكن ندور حولها بالتباديل و التوافيق
بس نبعد عن الشواذ الله يكرمكم
يعني لما نخترع مكونات
ياريت تكون مقبولة عقلا علي الاقل
ممكن اوي نعمل الكانيلوني بالحشوات ديه بس بدل ما نعمل عجينة الكانيلوني
ممكن نجيب بتنجان رومي كبير و نقطعة شرائح طوليه و عريضة و نشوحة في النار في زيت بسيط علشان يستوي و ينفع نثنيه زى كده
بعد ما بنحشي الكانيلوني باي خلطة من الخلطات اللي عملناها
بنجيب صينية بايركس و نحط فيها صلصة طماطم بتاعة الباستا
نغطي قعر الصينية بصلصة الطماطم
انا هقول علي طريقة الصلصة اللي بعمل بيها
في حلة بحط شوية زيت سخنين و اذبل فيهم بصلة كبيرة مقطعة مكعبات صغيرة
و اقلب شوي لحد مايذبل و بعدي احط تقريبا 5 فصوص ثوم مهروين و اقلب تاني و لو عندنا ريحان اخضر نحطه مفروم خشن و بعدين احط نصف كوب خل و قلب شوي لغاية ما المكونات تتجانس
و بعدين احط عصير كيلو طماطم و عليه الملح و الفلفل و اسيبه يتسبك لغاية ما يصبح عندنا صوص ثقيل
احط الصوص ده في قعر الصينية
و ارص عليه الكانيلوني المحش
انا بعمل الباشاميل ازاااي؟؟؟
كيلو اللبن احط عليه 4 ملاعق كبيرة دقيق و اضربه في الخلاط
و بعدين احطه في حلة علي النار و عليه ملح و فلفل و ملعقة كبيرة زبدة او سمن
و اقلب لحد ما يصل للقوام المرغوب فيه
انا بحب القوام بتاعه يكون كريمي
ممكن نحط بيضة علي الباشاميل بعد ما يبرد
(ساعات كتير مابحطش)
بعد ما نحط الباشاميل علي الكانيلوني المرصوص في الصينية احط عليه بالملعقة طبقة صلصة تاني
مش كتير برضه
و بعدين ارش الوجه بجبن بارميزان مطحون او رومي مبشور
ممكن طبعا نحط الصلصة الاول علي الكانيلوني و بعين الباشاميل
و ممكن نستغني عن الباشاميل اصلا
ده مسألة زوق
(مش هتفرق يعني)
و ادخله الفرن تقريبا نصف ساعة ممكن يصل لساعة الا ربع
في الرف اللي في النصف
علشان يستوي من فوق و من تحت
هتكون الجبن ساحت و الجوانب بان عليها السوا
و اطلعه
و يقدم ساخنا
ساحة النقاش