لو بتحب بلدك

لو بتحب بلدك

لو بتحب بلدك صحيح

حافظ علي ثورتك

حريتك .. إنزل التحرير

دا ولاد الأبالسة لسه

عينهم علي همتك

و فرصتهم التأخير

حيلهم كتيرة ومكشوفة

لكن مدسوسة

و سهلة التمرير

هدفهم تعطيل مسيرتك

تثبيط عزيمتك

وقف التغيير

نسيوا إنك لسه ثاير

وفي إصرارك علي حقك

و كرامتك ساير

ملاك في سلميتك مارد في همتك

و في الغضب

غول عارم كاسر

فرعون مات لكن الكهنة موجودين

متجمعين بروح متآمر سافر

منتظر ساكن مترقب غاشم

و في غفلة او تواني طاعن غادر

و الملاعين جيوشهم غربان

و قطيع ضباع جياع و خليط متنافر

متربصين مشككين مفتعلين أزمات

و فزاعات ... محتاجه منا تفكير

مؤسسة فساد متأصلة ... متغلغلة

و نزع جذورها عسير

الحمل تقيل ياأخوانا و الطريق شائك

و طويل يحتاج ... ألف تحرير

لو بتحب بلدك صحيح

حافظ علي ثورتك

حريتك ... إنزل التحرير

بقلم

السيد العربي رزق