اللاپ توپ
جهاز كمبيوتر محمول (المعروف كمان باسم نوت-بوك) وهو كمبيوتر محمول صغير ، وزنه بيكون في الغالب من 3 ل 12 رطل (1.4 لـ 5.4 كجم) و متصمم عشان الواحد يحطه على حجره و هو بيشتغل (لاب الانجليزى يعنى حِجر) على العكس من الكومبيوتر اللى بيتحط ع المكتب (الديسك) و اللى اسمه (ديسك توب). وبيبقي لللابتوب بطارية يشتغل بيها ساعات من غير ما يحتاج لأي كهربا تانية علي عكس الديسك توب وبيتميز كمان بارتباط لوحة المفاتيح بالشاشة دا غير الماوس الموجود فيه واللي بيسمحلك تتحرك بيه وتستخدمه لساعات من غير ما تحتاج ماوس ولا لوحة مفاتيح ولا حتي الشاحن بتاعه.

وفي السنين اللي فاتت ومع زيادة طلب الناس عليه، زاد انتشاره بشكل كبير وده لخفة وزنه وسهولة استخدامه وصيانته لدرجة ان مبيعاته زادت عن مبيعات الكمبيوترات المكتبية العادية.
تاريخه
لابتوب، مشهور في التمانينات: Epson HX-20

بعد ما ظهر الكمبيوتر الشخصي في السبعينات، ظهرت فكرت اللابتوب وأول حد عبر عنها كان ألان كاي Alan Kay سنة 1972 من شركة Xerox.

وسنة 1973، عرضت شركة آي.بي.إم مشروعها اللي كان بإسم IBM SCAMP project. وبدأ تسويق أول منتج للمشروع سنة 1975 يعني بعدها بسنتين علي إنه أول لابتوب اتصنع، وكان اسمه IBM 5100.

وفي سنة 1981، اتصنع أول لابتوب خفيف وصغير في نفس الوقت واللي أنتجته شركة أبسون وكان اسمه Epson HX-20 وكان له شاشة إل.سي.دي وبطارية للشحن وطابعة صغيرة في الحجم بوزن 1.6 كيلوجرام.
مميزاته
اشتغل وادرس في أي مكان أو وقت

    الحجم والوزن:

اللاب توب بيتميز بإنه وزنه أخف وحجمه أصغر بكتير من الديسك توب وده بيخليك تقدر تتحرك بيه لأي مكان.

    البطارية:

وبعكس الديسك توب تقدر تشغل اللاب توب بتاعك في أي مكان أو أي وقت لساعات وتكمل شغلك أو دراستك حتي لو مفيش كهربا.

    الانترنت:

أي لاب توب جديد فيه وايرليس وده بيخليك تقدر تدخل نت من أي كافيه أو مكان بيقدم الخدمة دي، مش كده وبس دا انت كمان تقدر تدخل نت من أي مكان حتي لو في سفر عن طريق اليو.اس.بي مودم لساعات حتي لو مفيش كهربا.

    الصوت:

معروف كمان عن اللاب توب ان صوته اوطي بكتير من أي ديسك توب ودي ميزة كبيرة لأي حد بيستخدم الكمبيوتر كتير.
عيوبه

    من عيوب اللابتوب ان كفائته وأدائه أقل من الديسك توب.
    كمان صعب يتغير أو تجدد حاجة من مكوناته.
    والعيب اللي فات ده بيخلي عمره أقصر من عمر الديسك توب لأنه لو باظت فيه حاجه ممكن متتغيرش عكس الكمبيوتر العادي اللي من السهل تغيير أغلب مكوناته.
    كمان ليه مشاكل صحية زي انه بيضر العمود الفقري والضهر والفخدين والإيدين غير ضرره علي الخصوبه بالنسبة للرجاله اللي بيستخدموه لأوقات كتير علي حجرهم.
    ده غير مشاكل السرقة بسبب سهوله حركته عكس الكمبيوترات المكتبية.

صفاته
لابتوب جديد Acer Aspire 8920

اللابتوبات الجديدة بتتميز بإنها بتتكون من جسم واحد فيه كل المميزات الموجودة في الديسك توب بحيث يكون حجمه صغير ووزنه خفيف عشان يبقي سهل اننا نتحرك بيه، وفي الوقت نفسه ميستهلكش كهربا كتير عشان البطارية تقدر تشغله أطول وقت ممكن واللي لازم تكون قوية عشان تفضل أطول وقت مع أي استخدام.

لازم كمان يكون فيه مشغل دي.في.دي، وفيه فتحات يو.إس.بي، وشاشته تكون إل.سي.دي، ويكون فيه لوحة مفاتيح وتاتش باد، ويكون فيه بلوتوث و وايفاي ويقبل سلك نت وتليفون عشان تقدر تدخل نت في أي مكان. وحجم اللابتوب بيفسرلنا ليه سعره أعلي من الديسك توب حتي لو كانت المواصفات واحدة.
تصنيفه

بمرور الوقت ومع كتر استخدام الناس لللاب توب بقت كلمة لاب توب بتشير لأنواع وفئات كتيرة من الكمبيوترات واللي منها:

Full-size Laptop - Netbook - Tablet PC - Ultra-mobile PC - Handheld PC - Rugged - Ultrabook

وده عشان يكون لكل نوع منهم مواصفات ضرورية لفئة معينة بحيث يقدر يغطي احتياجاتهم بأقل مشاكل وأسعار.