قالوا ده بلدي
بيكتب حروف مكسره
مش محكومة بقافيه
مش ملزومه ببحر
وزي ماتيجي ماشيه
-------------------
انااللي حيرت الحروف
وكتبتها
مره بمشاعر 
وألف مره عزفتها
وانا اللي حسيت المعاني
ولماحسيتني
عشت جوه الحروف
عاشتني...  فعشتها
انااللي خليت القوافي تتكسف
وانااللي خليت الانثي
أجمل ملامح تتوصف
وانااللي كلمت النجوم 
فوق في السما
وانااللي بدمعي
رويت الجفا
أصل الحكايه مش قوافي تترسم
أو تنزل قاع البحور
أو تتطلع قمم
الحكايه وبساطه
أن تكتب مشاعر
ترسم مشاعر
أن تخلق إحساس من العدم
انك تكون انسان بسيط
حلمه بسيط
بس الأكيد
انك تحسه بوقت فرحك
زي ماتحسه وقت الالم
كذاب يلا قلت الشعر
بحر وقافيه
ماهي الاميره هي هي
لابسه ولا ماشيه حافية
والصعلوك آخر يومه نوم
زي الملوك 
كله زي كله
والشهر كان اصله يوم
ولو مش عجبك كلامي
أسأل عنتر يقولك
اكمنه كان بسيط
وأقل من البسيط
كان كل حلمه انه
يقول شعره وفنه
وينسى لحظه انه
كان عبد من العبيد
ياحابس الشعر
في تفعيله وقافيه
المهم تحس بمشاعر 
والقلوب دافيه وصافيه
مش مهم الحروف متكسره
ولا بنت حلوه
ولا مشاعرمتسطره
المهم تحس 
وتبقي فيه ناس حساك ومقدره
احمد عبد الحق