سلفنى تلاته جنيه 
على جنى القطن يا بيه 
عندى بنت بتتجهز 
آخر الشهر هتتجوز 
هنجيب كنبه بسحاره 
ونشرفها فى الحاره 
وسرير عمدانه نحاس 
وصندوق من غير ترباس 
وصنيه وقلتين 
وباجور وحلتين
ومرتبتين ولحاف 
وفستان نايلون شفاف 
والفرح والذى منه 
طبعا مش تايه عنه 
ونعلق حبة زينه  
والخيل ترقص وسطينا
وندبح عجل بتلو 
ونعزم الكفر كلو
ونأكل المعازيم 
ونفرق حبة ملاليم 
ونحاسب المأزون 
نكمل ع العربون
ونصبح ع العروسه
بفخدة ومشنة كوسه
وشوال مكرونه ورز 
أصلها رايحه بيت عز
وإن فاض حاجه هجيبهالك 
منتا مغرقنا بأفضالك 
منير خاطر