صرخة مكتوبة :
بقلم شريف بدوي 
 ---------------
راح اكتب صرخة 
ومش حاصرخ 
راح اكتب كلمة 
ومش حا انده 
أنا عارف كلمتي بتوصل
وعارف إنها بتوجع 
وعارف إنكم عارفين 
وعارف إنكم فاهمين
وعارف إنكم كارهين 
لحد يقول كلام يوجع 
 وعارف إنكم عايزين 
كلام ف الطبخ والمغنى
كلام يكون ملوش معنى 
أنا باكتب عشان أثبت حضوري 
باكتب عشان أعلن نفوري 
باكتب عشان أأقوم بدوري 
مش باكتب عشان جايزة
ولا باكتب عشان فايزة 
ولا باكتب عشان ترضى 
أنا باكتب عشان أرضى 
عشان متموتش بسكوتي
ده يمكن ينفعك صوتي 
ده لولا ناس بتتكلم 
عمرك ما كنت تتعلم 
ننام نصحى على المغني
يسكن بس اوجاعنا 
لكن مازال الألم فينا 
ولسه العلة جوانا 
زي ما روحنا ساكنانا 
كفاية شبعنا م التضليل
كفاية موتنا م التهليل 
كفاية نعيش بلا معنى 
كفاية تصموا آذانكم
كفايا تغموا انظاركم 
خافوا الله يحاسبكم 
عشان كده باكتب لكم صرخة
أحسن ما ينشرخ صوتي 
عشان كده باكتب لكم كلمة 
دي الكلمة حتعيش بعد موتي 
ويمكن ف يوم الكلمة تنفع 
أو عني ف يوم تشفع .....