ما هي خطوات استخراج تأشيرة الشنجن بالتفصيل وازاي نزبط الورق المطلوب للتقديم؟
أهم حاجة وانت بتقدم على تأشيرة اوروبا هي تزبيط الورق، علشان كدة هنتكلم عن تزبيط الورق بيكون ازاي، مش مجرد ايه الي مطلوب … ازاي نعمله كويس علشان السفارة تقبله وتقتنع بيه وتوافق على التأشيرة.
١- احجز ميعاد في السفارة
كل سفارات من سفارات الشنجن وليها طريقة لحجز ميعاد فيها. اسهل حاجة طبعا علشان تعرف تاخد ميعاد من السفارة الي عايز تقدم فيها،
في سفارات مع شركة تقديم اسمها TLS وسفارات تانية مع شركة اسمها VFS .
بتمشي على الخطوات على كل موقع وتحجز الميعاد الي يناسبك.
٢- استمارة التقديم
بتتعمل اونلاين
مصاريفها 80 يورو هتدفعها يوم التقديم. بالمصري.
٣- جواب الشغل HR Letter
ده من اهم المستندات الي بتقدمها للسفارة علشان تثبت ان عندك وظيفة ومصدر دخل شهري. مفيش صيغة ثابتة للجواب، لانها بتختلف من شركة لشركة، بس الفورمة الاساسية بتاعته ممكن تكون كالآتي على letter head من الشركة ومختوم بختم الشركة كمان.
الجواب بيكون مكون من فقرتين اساسيتين:
– اول فقرة بتكتب فيها انت شغال ايه في الشركة – من سنة كام – مرتبك الشهري كام
-الفقرة التانية بيكون فيها تواريخ السفر المتوقعة والموافقة على الاجازة من الشركة، وانك راجع تكمل شغلك في مكتبك بعد ما تخلص رحلتك.
طيب لو عندك عمل خاص او شركة؟ بتقدم سجل تجاري للشركة، بطاقة ضريبية، وميزانيات الشركة كمان مختومة من المراجع القانوني بتاعها. الغرض من الورق ده انك تثبت ان عندك شركة حقيقية وشغالة بالفعل. ترجم الورق في مكتب ترجمة معتمد من السفارة علشان يكون بالانجليزي. بعض السفارات زي الايطالية مثلا، بتطلب ترجمة ايطالية لبعض الاوراق.
طيب لو انت طالب؟ بتقدم ورق قيد من الجامعة يفيد انت في سنة كام. لو انت في جامعة خاصة ودفعت المصاريف الغالية بتاعتها، قدم كمان صورة من ايصال دفع المصاريف. علشان يطمن انك طالب وبتدرس فعلا ودافع المصاريف للجامعة بتاعتك علشان ترجع لها.
لو انت طالب او عاطل لسه عن العمل؟ ممن تقدم جواب عمل لوالدك ووالدتك، علشان تقولهم ان اهلك بيشتغلوا وبيصرفوا عليك. المستندات دي بتطمنهم انك مقتدر ماديا وعائليا وقد تنفع في تحسين موقفك في السفارة.
٤- حجز طيران
السفارج عايزة انك تقدم حجز طيران للرحلة بتاعتك بالمواعيد الي انت كاتبها في الاستمارة. مش لازم تحجز حجز مؤكد ومدفوع على الانترنت او من شركة طيران.
٥- حجز الفندق
الفكرة في حجز الاقامة هي تقديم حجز شكله واقعي … ازاي؟
بتدخل على موقع زي bookingcw.com وتدور على فندق او هوستل وتعمل حجز لمدة اسبوع مثلا.
وخد بالك مش تروح تعمل حجز لمدة اسبوعين في مدينة واحدة. هتكون حركة مفقوسة انها مضروبة. حتى لو الحجز مؤكد من موقع bookingcw او اي موقع تاني. لازم تقنعه انك هتعمل جولة وعندك برنامج للسفر داخل البلد.
اعمل الحجز free cancellation علشان تقدر تلغيه بعد ما تاخد التأشيرة. اوعى تلغي الحجز بعد ما تقدم الورق علشان السفارة ممن تتصل بالفندق وتسأل على الحجز بتاعك.
٦- التأمين الصحي
معظم شركات التأمين المصرية والاجنبية العاملة في مصر بتعمل تأمين السفر. بتروح شركة زي الدلتا للتأمين اوAllianz تعملهولك في نص ساعة. لازم يكون معاك صورة الباسبور وبتعمل تامين يغطي فترة التاشيرة المطلوبة. يعني لو مقدم على رحلة اسبوعين، بتعمل تأمين اسبوعين او شهر. لو بتقدم على سنة، بتعمل تامين سنة. الشهر بحوالي ١٠٠ – ١٢٠ جنية. قدام كل سفارة كمان هتلاقي مندوبين شركات تامين كتير بيعملوا تامين السفر. بيكون عادة تأمين طبي بيغطي دول العالم كلها ما عدا امريكا وكندا، لان اسعارهم اغلى كتير.
بعض السفارات بتطلب تأمين بقيمة 30 الف يورو. المقصود بالقيمة دي هي قيمة التغطية التأمينية بتاعتك في حالة لا قدر الله اصابك مكروه وانت مسافر. بتتأكد من شركة التأمين ان الوثيقة المصدرة فيها قيمه تأمينية بالمبلغ المطلوب من السفارة، ان طُلب.
٧- تاريخ السفريات السابقة
ده ممكن تثبته بحاجتين: شهادة تحركات وصور جوازات السفر القديمة:
– لو اول مرة تقدم شنجن، بتعمل شهادة تحركات من مجمع التحرير وبتاخد حوالي اسبوعين. بعض السفارات بتطلبها حتى لو مش اول مرة تقدم على التأشيرة.
– ثانيا، تصور جميع الصفحات المختومة او عليها تأشيرات في جوازات سفرك القديمة والجديد كمان. لانك لازم تقدمهم كلهم وانت بتعمل التأشيرة. علشان كدة لو اترفضت في اي سفارة، مفيش داعي لتغيير الباسبور. ثانيا بيكونوا عارفين في اي سفارة شنجن انك قدمت امتى وفين قبل كدة. المقالة دي كانت بتقولك تعمل ايه لو اترفضت.
٨- صور شخصية
بتقدم صورة شخصية حديثة … متصورة قبلها بيومين مثلا. ما ينفعش تدخل السفارة مربي دقنك وتديله صور وانت حالق دقنك.
٩- كشف حساب البنك
احد اهم طلبات السفارة هي كشف حساب بنكي الخاص بالمرتب الشهري بتاعك، علشان ده بيثبت انك موظف وعندك دخل شهري ثابت …. “طيب افرض انا عليا قروض وجمعيات وبخلص مرتبي كل شهر؟ شكل كشف الحساب هيكون وحش وانا مقدمه فاضي كده؟ طيب استلف ٢٠ ولا ٣٠ الف من امي ولا ابويا ولا اقبض الجمعية بدري واحط الفلوس قبل ما اطبع كشف الحساب؟” …. غلط!!!
لو سمحت استلف المبلغ ده او اقبض الجمعية دي قبل ما تطبع كشف الحساب ب ٦ شهور، علشان لما تطبع كشف الحساب، يبان ان فيه فائض شهري من الفلوس هتصرفه على السفرية دي.
ممكن كمان تقدم كشف حساب كروت الائتمان بتاعتك لو فيها حركة شهرية كتير. بتكون دليل على انك مقتدر ماديا والفلوس معاك رايحة جاية.
طبعا ممكن تقدم حسابات توفير في البديد او بنوك تانية. ودائع بنكية في اي بنك آخر.
طيب لو مرتبك الشهري قليل، بس عندك فلوس في حسابات شخصية تانية، تعمل ايه؟ ….. ممكن تعمل ايداعات شهرية منتظمة في نفس تاريخ مرتبك. يعني مثلا المرتب ٢٠٠٠ جنية في الشهر، اعمل ايداع ب٥٠٠٠ مثلا في نفس تاريخ نزول مرتبك. لما تعمل المقابلة وحد سألك في السفارة، قول ان مرتبك مثلا جزء ثابت وجزء متغير بينزل منفصل كل شهر. كدة يبان ان في دخل شهري بمبلغ ٧٠٠٠ جنية مثلا. برضو الكلام ده تعمله لمدة ٦ شهور. اهم حاجة ان الحساب يكون فيه حركة سحب كمان علشان يكون شكله حلو.
لو انت طالب او عاطل، قدم كشف حساب والدك ووالدتك. حسابات جارية، حسابات توفير، ودائع بنكية، ان شاء الله حتى شهادات قناة السويس. اي مستندات بتثبت بيها انك مقتدر ماديا.
١٠- جواب دعوة من مستضيف
هو ده الي بيقولوا عليه السم في العسل!! كتير فاكرين اني لما اروح اقولهم في السفارة اني رايح ازور خالتي في امريكا ولا عمي في هولندا، السفارة هتطمن اني هلاقي حد يتكفل بمصاريف اقامتي وانا هناك.
السفارة غالبا هتكون شاكة انك هتروح تبلط هناك في الخط زي همام في امستردام كدة. هتكسر تاشيرة وتقعد عن خالك وتشتغل شغل غير شرعي والقصص دي. ارجوك ارجوك ارجوك، لما تقدم على التاشيرة، قدم على اساس انك سايح فقط. احجز فندق واعمل برنامج للرحلة بتاعتك، وما تجبش سيرة حد هناك.
ساحة النقاش