الأسمراني
يا ام صبري
،
لما يوم حكم الفراق بينك وبيني
لما مات القلب
والدموع سالت بعيني
،
قولت يومها الموت حرمني من حنانك
ياحبيبة
والمرار دوب حنيني
،
قولت اجرب اعيش بدونك
وامشي وحدي
ف كل خطوة يزيد انيني
،
اختي فعلا طبطبت واحتوتني
بس صوتك
اترسم في خطوط جبيني
،
الحياة كانت تلاهي
وكل حي ف امره لاهي
وانتي يما بتوحشيني
،
غربة سرقت عمري مني
عشت تايه
كنت بدعي الموت يجيني
،
كل شيء اسود وكاحل
فجأة طل ملاك وشايل
حب دافي وبيناديني
،
قال انا ام وحبيبة
والملامح مش غريبة
لهفة دبت فالوريد يلا الحقيني
،
كنت غرقان في الجهالة
كل يوم تنده تعالى
والشيطان كان محتويني
،
العلام منك هداية
انتي ياساكنة ف حشايا
احضنيني ودوبيني
،
علميني ازاى اكون
انسان طريقه كل نور
خلي كل ضلال يغور ماتشوفه عيني
،
النهاردة بقول يا امي
انا امي على قيد الحياة
ربنا هداني بملاك نور سنيني
،
كل عيد وانتي فسعادة يا ام صبري
نور في قبرك
نفسي اقول لو تسمعيني
،
انتهى عصر السكات
احتيا قلبي اللي مات
عاد صوابي والامان اللي ناسيني
،
صبري شومان
