{الف دقه ودقه} قصيده للشاعر خالد العطار

عديت دقات القلوب
لما شفتك يا حبيبى ألف دقة
دقة تدوبنى بشوق
ودقة فى حضنك تاخدنى برقة
ليه بلاقى فى بعدك
ياحبيبى نار وحرقة
ليه بتتعمد فى قربى
تقول بعاد وتقولى فرقة
النهاردة يا حبيبى انا بين ايديك
النهاردة قلبى جاى
بدقاته يسلم عليك
النهاردة جاى اقولك بشوقى
انا كلى ليك
وحشتنى فى بعدك رقتك
ولهفة عنيك
النهاردة داب كل الوجع
من لمسة اديك
عايز تفارق ؟
يعنى نسيت قوام شوقى ولهفتى
يعنى الشمس بالدفا
تهجر خلاص دنيتى
يعنى أموت بالبعاد
وتنتهى بين ايديك قصتى
أهون عليك؟
ضمنى جوا حضنك يا حبيبى
وانسى الفراق
طويت ليالى البعد بدنيتى
وسنين الاشتياق
عشان خاطرى
خليك جنبى هنا
دا اللى فاضل من حياتى
ما يكفى فى بعدك يوم
مش سنه
واللى باقى
جوا قلبى شوق
بيطفى جوا روحى
ألف شمعة هنا
واللى فاضل من دقات القلوب
هيه دقة
بعد ما دابت بين اديك
ألف دقة ودقة
خالد العطار