جارى التحميل
استخدم زر ESC أو رجوع للعودة
الشاعر//محسن حلمى
حزموني يا بنهاويّة
رقصوني في بورسعيد
علّـقّي يا اسكندرية
الزينات لخر الصعيد
زغرتوا يا شرقاوية
سمّعوا الوادي الجديد
واسماعيلية الأبيّة
والسوايسة بالتحديد
سمعوني السمسمية
قول يا بمبوطي وزيد
عدّوا ع التحرير شوية
فرّحوا أم الشهيد
مصر رجعت ليكو ليّة
والجميع فرحان أكيد
ِِِ
خش من أسوان يا صاحبي
واحضن النيل الجميل
فوت على أسيوط حبايبي
وفـ بني سويف قول يا ليل
ليل يا عيني وغنّي جنبي
من سوهاج نسمع مواويل
فرحكم زاد فرح قلبي
خد من المنيا دليل
روح قنا .. الفيوم وعود بي
للبحيرة .. سفاجة .. مِيل
ع الهرم في الجيزة صاحبي
ولدمنهور يا أصيل
حِلْيِتْ الدنيا يا ربي
بعد ما كان مستحيل
شمس بكرة جت تخبّي
ضلمة الليل الطويل
ِِِ
أوعى تنسى سينا يا بني
خد لهم سكر نبات
وانت جاي من طنطا يعني
جيب حلاوة للبنات
ع الولاد وزّع وهنّي
فوت على قويسنا وهات
جوز حمام م البرج بني
دا الحمام أكل الذوات
واوعى تنسى .. افتكرني
م المحلة هات حاجات
هاتلي حِنّة وإيدي حنّى
رقّص الإيد بالصاجات
خلّي كل الناس تغني
حتى مطروح والواحات
مصر رجعت جت فـ حضني
أحلى حضن معاه أبات
ِِِعدّي ع المنصورة عمّي
صحّي مأذونها الأمين
نادي دمياط قومي هِمّي
في الورش والنجارين
زوّدي الأويمة لأمي
في الجهاز ويكون متين
وابعتيه بالزفة لمّي
كل أحبابها يا زين
وانتي يا عايشة في دمي
غبتي عن ابنك لمين
أيوة محسن ابن حلمي
اللي عِشقِك فيه دفين
خشّي في لحمي وضمّي
نفسي حضنك من سنين
الشاعر//محسن حلمى
المصدر: sabertwky
المبدعــــون الشبــــاب//للشاعر صابر الطوخى
