Ahmed Manswr
وأنت رايح تدلي بصوتك
فكر يامصري وافتكر
مين اللي كلن يهمه موتك
مين اللي عايزك تنكسر
وافتكر
مين اللي دافع عن حلم
كان جواك دفين
ومين اللي دمه كان تمن
دفعه وهو مش حزين
أنا مش هاقولك تدي لمين
سلف .. إخوان .. ليبرالي
وألا فلول
عشان ياصاحبي صوتك أمانة
وهتتسأل يوم القيامة
وأنت اللي هتكون المسئول
اقف وقول واختار صح
وافتكر اللي مات
الطلقة كانت تمن الفـَرحْ
وافتكر اللي كان هو السبب
في ألف أم بقي قلبها
أنكوي علي ابنها
وبقي جوه منه ألف جرح
أوعي تنسي ياصاحبي الشهيد
اللي أمه كفنته
بدل فرحه ببدلته
كان نفسها تشوفه في الكوشة
وتفرح ياعيني بدخلته
وبدل زغروطة الفرح
الطلقة جت قتلته
وقلب أمه أنجرح
وصوتك هيبقي فرحته
بس أوعي تنسي اللي أتعمل
وافتكر الحرب اللي كانت
في موقعة الجمل
أوعي تنسي الدم اللي كان
مالهوش ياصاحبي حدود
اللي ملا ارض الشوارع
عند ماسبيرو ومحمد محمود
الدم دا دين علينا
وجه وقت السداد
وصوت الشهيد ينادينا
مش عايزين تاني فساد
ورا الستارة هيكون قرارك
افتكر عمايل العصابة
البلد بعد اختيارك
إما جنة وإما غابة//الكاتب احمد منصور