الكاتب//احمد منصور

ليه ياقلم رافض الكلام

أوعي تقول حبرك خلص

أوعي تقول عزمك نقص

ودي بداية استسلام

خليك ياقلم واقف لهم

شاهد عيان علي ظلمهم

واصرخ كمان في وشهم

صرخة تغني عن الكلام

أوعي سنك ينكسر

أوعي حبرك يتعصر

أوعاك تحس بالانهزام

قول ياقلم أوعي تخاف

عمرك ماكنت جبان , خواف

وأوعي تسكت وألا تنام

هيعملوا أيه فيك

هيكسرو سنك

هنمسكك تاني ونبريك

بس ماتبطلش كلام

انطق وقول واحفر حروفك

إياك تحسسهم بخوفك

لسه مرارة ظلمهم

جوه حلقك .. جوه جوفك

وأوعي  تقول تعظيم سلام

لو حتى حكموا بالإعدام

هتفضل حروفك طلقات رصاص

جوه الكتاب جوه الكراس

أوعي تكتك تاني كلام

سجل ياقلم واكتب كتير

قصص الفساد والتزوير

اكتب .. ارسم .. انطق وقول

عن اللي عملوه الفلول

احكي حكاية بلد أتسرق

واللي سرقها اكبر مسئول

اكتب وسجل للتاريخ

ارصد لبكره كل تاريخ

أتلوثت فيه أيديهم

بدم طفل ودم شيخ

 قوم تاني واكتب ياقلم

احكي عن شعب أتظلم

احكي للدنيا الحكاية

من البداية للنهاية

ع اللي من حقه أتحرم

ع اللي داسه الظلم وفرم

ع اللي بسبب الحق أتعدم

ع اللي مات من الألم

احكي واكتب قول وسجل

قبل ماتشرب كاس الندم

أوعي تاني في يوم تسلم

اكتب ياقلم قول وأتكلم

إياك تعلن الاستسلام

اكتب وخلي ياقلم حروفك

تبقي رصاصة الانتقام

الكاتب// احمد منصور