الكاتب//احمد منصور//احنا باين مكتوب لنا

احنا باين مكتوب لنا

نعيش خلاص متهددين

في الشوارع في المصانع

في الدارس في الجوامع

مش مهم أمتي وفين

فجأة أي عدد يموت

في حريق في قطع طريق

في مظاهرة بحجة التفريق

بقينا ماشيين مستنيين الموت

برشاش .. بمولتوف

بمقروطة وألا حتي بنبوت

ويفتحوا ورق القضية

ويختلفوا في التسمية

ياتري مين اللي عملها

الطرف التالت

وأ لا الأيد الخفية

وكام يوم والموضوع يفوت

ويجي الدور علي غيرنا

وإحنا قاعدين نستني

الحقيقة لما تظهر

بس ياخسارة

بقت زينا بتموت

ونرجع تاني لنفس الحيرة

ماالمصايب بقت كتيرة

طيب ياتري هو

الطرف التالت

وألا الأيد الخفية

طيب ياتري مين اللي عملها

من جوه وألا من بره

وتتكرر ألف مرة

وكفاية علينا

يصرفولنا لقب شهيد

وكل مرة نفس الكلام

وماعدش في كلام جديد

والتحقيقات تفضل شغالة

ولجان كتير عمالة

تدور في كل مكان

تبحث عن الادلة

وتثبت بالبرهان

وبعديها يطلع بيان

يقول اللي عملها واحد جبان

ومش هنسيبه

ولازم الحقيقة تبان

وتتشكل لجنة لتقصي الحقايق

تروح تحقق في المدابح والحرايق

كل دا اوام بسرعة

اصل الشعب مضايق

والشعب عشان دايماً علطول

باكل العيش ياعيني مشغول

والتحقيقات مابتنتهيش

ومعروفة وقتها بيطول

الموضوع تلاقيه اتنسي

وطبعاً دي ليهم كويسة

لحد ماتحصل كارثة جديدة

نهبدأ نعيد تاني الأحداث

اللجان والتحقيقات

ونفس الدوشة ووجع الراس

وعمرنا في النهاية

ماوصلنا مرة لحقيقة

ولاعمرنا نهينا موضوع

مهما تكون تحقيقات دقيقة

الوصول للجاني ممنوع