الشاعر ابراهيم الوراقي‏

لسه هنشجب وندين

الله يلعنكوا ليوم الدين

ده الدم مطرطش ع الطرقات

سُخن الدم يابنىّ ادمين

لو مرجعش الحق الأن

يبقى العقل ده لسه تخين

شيلنا رئيس

جيبنا رئيس

أخيب وأخيب م التانيين


عينى عليك ياضنايا


قلبى بيبكى وضميرى حزين


ذنبك ايه فى الخيبة النائعة


راسك ليه تتلطخ طين


لسه الدم المصرى رخيص


ياأهل العسكر ويا أهل الدين


مانتوا الساده العُظما الأن


وف كراسيكم بايديكوا ماسكين


هى بلدنا دى ايه؟؟؟


بتقتل فينا وخيرها لمين !!!


دى بتسقينا المُر كاسات


وبتدى الخونه نياشين


ترفع ناس يبعوها فى ثانيه


وبتغرسنا اوام فى الطين


لسه اوان العدل ماجاش


وحياة ربى رب العالمين


ماهسيب الحق


وتمنه رقبتى


ماهسيبه يضيع لو يوم الدين


احنا طلعنا اليوم للحق


واستنانا ياصنم السلطة


وحياة أمك

راجعين راجعين


( إبراهيم الوراقي )

خلاص وصلنا للنهايه ؟؟؟

تعبنا خلاص ...

تعبنا خلاص

وقولنا كده كفايه!!!

مات الأمل جوانا

واتسمرت بينا الخطاوي

خلاص وصلنا للنهايه ؟؟

لأ ... لأه ... لأ

ارفض تكون دي النهايه


دانا خويا مات ادام عنيا في البدايه

لما إتسطرت بدماه حكايه

قولت اكمل قصته تاني بدمايه

كانت سطورنا بتضوي لسه ع الطريق

كانت حريق

كنت شايله في صدري

ابني أو صديق

دمك ياصحبي ...

لسه بايت في الشوارع

لسه مرمي بتلحسه كل الكلاب

وانت واقف بتبصلي وبعنيك عتاب

غصب عني صحيح ياصحبي

ضهري انقسم من غدر الصحاب

من خيانة عهدهم أو جريهم

خلف الكراسي ذي الدياب

روحت مني صحيح ياصحبي

بس انت راجع

تارك ياصحبي لسه منتهاش

مش راح ابيع حلمي ببلاش

حلمي وحلمك هكمله

وده وعد مني ماتناساش

اوعوا حد يقول كفايه

اوعوا حد يقول كفايه

مش هنسمح تيجي النهايه

قبل تارك يا الشهيد مانخده

او نموت لما نقف

ونقول كفايه

( ابراهيم الوراقي )