الشاعر بلال عيد

يا جي مصر منك كتير

فيها الوزير والغفير

واللى نفسه يكون وزير

فيها اللى هادى والمدمن جعير

فيها اللى فرحان باللقا

و اللى مدمن تريقة

و اللى مطحون م الشقا

و اللى نايم ع الحرير

فيها اللى عازف غنوته

واللى عارف سكته

واللى قادر يحبطه

ويدوقه الطعم المرير

فيها اللى شارى واللى بايع

واللى واكل واللى جايع

واللى ضاع بسبع صنايع

سبع صنايع ... !! مش كتير؟؟

فيها اللى مستنى البشاير

و اللى لافف كعب داير

واللى ظالم .. واللى جاير

واللى معدوم الضمير

فيها اللى مشحون بالأسى

و اللى غاوى وسوسة

واللى من صمته اتنسى

و الصنف ده منه كتير..!!!!

فيها اللى عالم بالأمور

و اللى متأنى وصبور

واللى يرغى كالوابور

ف كل حاجه كلام وفير

فيها الجميل الأسمرانى

و الحليوه المعجبانى

و المتيم أمريكانى

و اللى مالك و الأجير

فيها اللى دايس ع الزناد

و اللى حامى للبلاد

و اللى رافض للبعاد

وكأنه ف الغربه أسير

فيها اللى نايم و المصحصح

و المغفل والمفتح

و المؤدب والمشرشح

واللى بين وبين يسير

فيها اللى قاسى و الرحيم

و اللى مشغول ب الريجيم

واللى أهلاوى و صميم

و الزملكاوى وخطير

فيها اللى همومه كتروا

و اللى مدمن باص ومترو

واللى نزلوا بدون ما فطروا

كله رزقه ع المجير

فيها اللى فاهم والمقاوح

واللى على قلبه مراوح

واللى سهران واللى صابح

حامد المولى القدير

فيها اللى فكره منطقى

واللى متوضى ونقى

و اللى دايما مشتكى

من أى حاجة ف ايد الغير

يا مصر راجع من سكات

عاشق حاجات رافض حاجات

وانتى اللى مذكوره ف أيات

ف كتابه مولانا القدير

ولما شوقنا ليكى خدنا

لكل حارة وكل مادنه

لقيت كتاب على باب بلدنا

يا جى مصر منك كتير

الشاعر//بلال عيد

كل حروفي تشتاق لها

وقلبي لا يرتوي

إلا بالقرب من إحساس قلبها

كذبت حين قلت

تكفيني نظرة عينيها

وإبتسامة شفتيها

نعم كذبت

فأنا رجل لا أكتفي بنظراتها

احتاجها

بكل مشاعرها

بدفئ أحضانها

ولمسة إحساسها

وشوق نظراتها

أحتاجها بجنون الرجل العاشق

نعم أعترف

فأنا رجل لا يرضى بالقليل

لا إكتفي بنظراتها وابتسامتها

فهي لا ترويني

لا زلت ضمآن

احتاج حبها بكل صدق

ليروي عطشي

فقط

أحتاجها

اهداء خاص لكاتبتنا الرائعه واستاذنا الكبير

ارق تحياتى///شكرا ليك بلال ولزوئك الجميل ودى منا لك هدية حبيبى كل التحية بلال