راديو بجد Radio BGD
احنا مين ... بصراحة فكرنا كتير اوي علشان نجاوب علي السؤال ده..اصلنا مش هنضحك عليكو ...السؤال ده صعب اوي يعني.
احنا راديو بجد الراديو الالكتروني.. التنموي الأول في مصر وممكن في الوطن العربي كله.. بس بصراحة مش هو ده كل اللي احنا عاوزينكو نعرفوه عننا.
اللي عاوزينكو تعرفوه عننا ان احنا مصريين بجد .. مصريين عاوزين يعملو حاجه بجد .. عاوزين يعملو حاجه تنفع متضرش .. حاجه من غير توجيه او تمويل او غرض معين.. احنا نبت ارض البلد دي.
مبنقولش ان احنا بس اللي بنحب مصر.. بس بنعتقد ان احنا اكتر ناس بتحبها.
طيب احنا عاملين الراديو ده ليه؟؟؟
عاملين الراديو ده علشان نغير نفسنا قبل ما نحاول نغير الناس .. احنا ولا لينا غرض سياسي ولا غرض ديني ولا غيره ....احنا مصر بحروفها التلاتة....بأديانها المختلفة احنا مصر المسلم والمسيحي ف قلب بعض .. احنا مصر العامل مع الفلاح راشقين ف بعض .. احنا مصر اللي جرح بني ادم منها ف اسكندرية بيسمع ف قلب اخوه ف أسوان.
احنا مصر اللي عرق شعبها اتخلط ببعضه ف بناء سده العالي .. احنا مصر اللي دم ولادها سقي ارض سينا ف 73.
احنا ولاد سيوة و الداخلة و السلوم ومطروح و قويسنا والمنصورة و اول فيصل والمتحف المصري و السبع سواقي و السيدة زينب وشبرا والاقصر واسوان و اسكندرية وحلوان وقنا وميدان الساعة و روكسي ..... احنا ولاد مصر.... ولاد البلد دي .
ليه سمينا الراديو ... راديو بجد... لاننا نفسنا نقدم كل حاجه بجد .. لعب بجد .. وحب بجد .. وجد بجد .. ومزيكا بجد ... يعني ايه كلمة بجد .. يعني عاوزين كل كلمة بنقولها تأثر فيكو وتخليكوا تحلفو ألف يمين انكو تبنوا في البلد دي متهدوش
تخيلوا لو كل حاجه جوانا حصلت بجد ... يعني اشتغلنا بجد .. واتبسطنا بجد .. وحبينا بجد ... صدقوني الفكرة ان احنا ندي كل حاجة حقها . هتبقي حياة حلوة .. حياة مريحة ... حياة تعجبك