قرأة فى نماذج إنسانية

بعد أسبوع عانيت فيه من شعور الاكتئاب والهم قررت ان اقف وقفه مع  نفسى ارتب افكارى علشان ارجع تانى للحالة الطبيعية المستقره واعرف انا رايحه فين وجايه منين و استطيع قرأه رسايل ربانيه ربنا بيرسلها لعباده و كل انسان وقدرته على الفهم اما انه يفهمها او لا يفهمها .

قررت انى احاول قرأة بعض الناس كما لو كانت اقرأ كتاب  و استشفيت ده منين من قول الله تعالى "إقرأ كتابك كفى بنفسك اليوم عليك حسيبا " فى النهاية تتحول حياه الانسان الى كتاب يقرأه امام الله .

اللى معايا انهارده كتابين ادميين يعنى نموذجيين من البشر مختلفين تماما و معايا قسم ثالث و هو مجموعه من الكتب هى القرأن الكريم و صحيح البخارى كمان احياء علوم الدين مجموعة كتب للامام ابى حامد الغزالى و هو بيعرض اركان الاسلام من اول الشهادة حتى الحج بيستعرض و يستدل بالاحاديث و ما ورد فى الاثر عن الانبياء السابقين تجعل الدين امامك رساله متصله من سيدنا ادم وحتى سيدنا محمد صلى الله عليه وسلم و المجموعة الثانية فتاوى الشعراوى و كتاب الرحيق المختوم لصفى الرحمن المباركافورى يروى حياة الرسول

و هعتبر مجموعة الكتب دى هى مقياس نقيس عليه الكتابين الانسانيين اللى هعرضهم على حضراتكم .

الكتاب الاول : ناشط مجتمعى

وضعت للكتاب عنوان ناشط مجتمعى حسب ما عرفته عنه و ناشط مجتمعى مش سياسى يعنى يعمل فى انشطه لصالح المجتمع علشان يفيد المجتمع و طبعا دعانى للمشاركه ولكن انا لم اعرف سوى العنوان فلازم اتصفح الكتاب .... لقيت ايه في الكتاب  ؟

لقيت انه كان بطل مصرى فى الملاكمه لعده سنوات ياه طيب الملاكمه دى لعبه عنيفه ومكروهه بالنسبالى يعنى ازاى الشخصية الطيبة دى تبقى عنيفه كده تلاقى كلامه انى بلعب ملاكمه من منظور اخلاقى يعنى مش لازم اضرب على جرح خصم او احرجه وسط زوجته واولاده لو حاضرين الماتش يعنى الملاكمه فيها اخلاق ؟ نعم

لقيت كمان انه لما بيكلم فى امور كثير انا بقول اهلا وسهلا بابا وصل طيب هل  هو شبه بابا لا هل متقارب قوى معاه لا لقيت ان تفسيرها العلمى انه متشبع بقيم المجتمع اللى عاش عليها الجيل السابق و قيم واخلاقيات كانت متأصله فينا فلما يتكلم تقول اه ده كلام بابا و هو فى الحقيقة كلام موروثات قيمنا و اخلاقيتنا ...يعنى متسق مع قيم واخلاقيات المجتمع ؟ نعم

ما الهدف لنشاطه المجتمعى ده ؟ هل بيسعى لسلطه مثلا للحكم ؟ لقيت انه لا مش عايز بيحب البلد و عايزلها الخير بس

انسان بيقول انه بار ببلده طيب هو علاقاته ايه مثلا ؟ بار بأصحابه ؟ نعم بار بأهله ؟ نعم بار بزوجته واولاده ؟ نعم لانه لو فى خلل هنا هبقى فى خلل هنا لان المبادئ لا تتجزء

طيب اسلوبه الحوارى شكله ايه ؟ " بيكره الاسلوب المبتذل و مدخل ده ضمن ميثاق عمله المجتمعى " الله هو فى ميثاق شرف للعمل المجتمعى ؟ ايوه هو عمل كده غريبه

طيب هو الانسان ده شكله ايه بقى ملتحى مثلا "لا " بيقول انا صح و اتبعونى " لا " شكله عادى بيكلم عادى و مش بيقول انا صح بيقول انا مواطن عادى زى مخاليق ربنا كده زينا طيب يعنى عايز ايه عايز مصلحة البلد بس

فى كلمه قالها عن الملاكمه انه الضرب على الرأس بيعمل حاجات كويسه تسأل ازاى ؟ بيقولك انه بيعلمك انك لما تنضرب و تقع تقوم وتقف ثانى ... دى حاجة جميله جدا بس انا هترجم الكلمه بشكل تانى 

ان فى غرفه الافاقه بعد العمليات الجراحية طبيب التخدير بيضرب طرقات خفيفه بين حاجبي العينين على الرأس علشان المريض يفوق

كمان لما يكون انسان فى غيبوبه فكريه لازم تضرب على عقله و افكاره علشان يفوق من الغيبوبه وانا هقف لغايه هنا فى قرأة هذا الانسان و هو نموذج عرفته فعلا عن قرب هذا الاسبوع او فى الايام الاخيره .

الكتاب الثانى : زميل - نحمل الخير لمصر

طبعا همسك الكلمه الاولى زميل هو زميل تحت نفس مسمى الجهة التى اعمل بها ولكن فى محافظة اخرى و لم اراه اعرفه من خلال مواقع التواصل الاجتماعى فقط ولكن قرأه الكلمات بتجعلك تقرأ البشر

اول تعارفى به كان على صفحة التواصل الاجتماعى من خلال كلمه قالهالى شعارنا "نحمل الخير لمصر " و طبعا هذا اختياره و اتجاهه وليست هذه مشكله

طبعا ايه اللى بينشره مثلا هل دعايه الى الله ؟ "لا "

هو كلام فى السياسة و ان اتجاهه السياسى هو من اجل الله والشرعيه و الشريعه جميل طيب باقى مضمون المنشورات هى كالعادة منشورات التشويه بما يليق و ما لا يليق لاى معارض و منشورات متداوله على الصفحات كما اعتدنا عادى كل واحد حر طيب هل ده كان من اخلاق الرسول التشويه و نقل كل نقيصه عن الاخر ؟ اكيد لا

و نصل الى الاحداث الاخيره التى حدثت فى بورسعيد و للعلم بحكم العمل نزلت و سجلت مع المصابين و رأيتهم بعينى ليسو بلطجية بل من ماتوا اغلبهم من اشرف الناس خلافا عما حدث من التصويب على احدى الجثث فى الجنازة ولن امارس التظاهر بالفصام لانفصل عن واقع رأيته بعينى ولن اكدب ضميرى و لن اكذب على خالقى

و نرجع لما حدث فى بورسعيد فى تبعات تلك الاحداث من عصيان مدنى و نقرأ كلمات هذا الزميل " شهداء ايه يا شوية بلطجية " طيب هو هنا بيخاطب مين زملائه على صفحه للزملاء و بعدين نرجع نلاقى " اعوذب الله من الخبث و الخبائث " لان المكان النجس لازم الانسان يقول كده لما يدخله " طيب ايه المكان النجس ؟يقولك هنا طيب ليه ؟ علشان احنا بورسعيديه ليه ؟علشانها احرجت السلطه طيب و حقوق الزماله رغم اننا بنقوم بعملنا طوال اليوم ؟ لا مش تبعنا

طبعا تلاقى بقا على صفحتى يتكرر نفس الكلام "شويه بلطجية " ، طيب منين عرفت انهم بلطجية  انت شفتهم ؟ لا شفت المصابين ؟ لا عارف الناس دى ثايره ليه ؟ انتوا قتله قتلتوا بتوع الاهلى حوار غير منطقى طبعا

بعدها طبعا حصل انى كتبت كلام يحمل معنى الاكتئاب تقوم تلاقى بعديها منشور عن اكتئاب حمدين صباحى و عقبال الباقى و هنا هقف احلل الكلام

انا شفت شئ يحمل طيات اليأس فى كلام انسان افرح واضرب على الجرح فاكرين كلام الملاكم عن الملاكمه و اخلاق الملاكم ؟ نعم طيب كانت الملاكمة فيها اخلاق ؟ نعم لكن السياسة فى مصر ما فيهاش اخلاق !!! طبعا لا اخلاق ايه طيب ليه انا عايز حمدين واى معارض يصل الى اليأس ؟ علشان يضعفوا ... ليه ؟ علشان النظام يقوى .... ليه ؟ علشان الاسلام ؟ طيب هى الدولة الاسلاميه هتقام بيأس الناس و مرضهم النفسى ؟ ايوه ليه كده

طيب هو ليه حمدين يأس ؟ تقوم تسأل عن هدف حمدين ؟ الوصول الى السلطه

طيب و انا زميلتك مش هدفى السلطه لكن معارضه طيب يعنى انا لو معارضه للنظام و معارضه كمان لحمدين استاهل كده ؟

ايوه ما حدش يعارض النظام الحالى والا يستاهل الجنان و نوصله لليأس ... ياه اليأس

هل بنراهن على وصول الناس للكفر ما هو اليأس كفر كل ده من اجل النظام و السلطه؟ هل بكفر الناس يقوى النظام و كمان يقوى الدين ...

طيب انا مش هيأس و لا هكفر

يقوم يعمل حاجة ثانيه اشد منها كل شويه يقولك اعوذ بالله من الخبث و الخبائث علشان يوصلك معنى معين انت " حمامات " زى ما هو قال يعنى انت بحقرك و اهينك و ده تكراره يعمل حاجة فى علم النفس اسمها ارتباط شرطى بين الدعاء المأثور عن الرسول عليه الصلاه والسلام و بين الشعور بالمهانه تقوم اول ما تسمع الحديث او الدعاء او تحاول تردده تشعر بالمهانه تقوم تبتعد عن ذكره و بعدها تبتعد عن الدين ده اللى بيشعرك بالمهانه

يعنى هكفرك هكفرك طيب ده ليه ؟ لانك معارض ولما يكلمك يقولك اصلكوا ضد الدوله الاسلاميه

يعنى انت بتعرف نفسك ليا انك تحمل الخير لمصر وانك تمثل الدين هل انت متسق مع الدين الم يقل رسول الله لان يهدى الله بك انسان خير لك من حمر النعم فكيف تراهن على كفر الاخرين

اذا عملت انت على وصول انسان الى الكفر فلن يسلم ايمانك

من كفر مؤمنا فقد كفر و اعتقد مش مجرد اتهامه بالكفر ده الاشد من اتهامه محاولات ايصاله للكفر

فى الحقيقه مش هقدر اكمل قرأه فى باقى صفحات الكتاب الانسانى الثانى لانها اعتقد انه اذا لم اجد اتساق الى هذا الحد فى هذا النموذج البشرى مع المعايير الدينيه والاخلاقيه و الاجتماعية المعروفه فاعتقد ان باقى صفحات كتابه لن تكون متسق ايضا و مش هراهن على وصوله الى الكفر بالعكس ادعوه للقرأه و التعقل و مراجعة النفس

زى ما هو واضح ممكن يكون فى انسان عادى من عباد الله وانفع من ناس تحمل شعارات و هى مفرغه من المضمون و النموذجيين موجودين فى المجتمع

اما انا فلن اكفر و لن ايأس ليه لانى قرأت الرساله الربانية بأن فى خير و فى ناس طيبين معرفتهم بتكون بتوفيق من الله و لان فى صله لا تنقطع بينى وبين الله يمكن اعتدت فعلا ان فى صلوات تضيع منى الا صلاة الفجر اللى بتبدأ مع بدايه منحة من الله علشان اعيش يوم جديد فتعطيك امل مع شمس يوم جديد

 و لانى بتمتع بمحبه ناس مخلصين ولانى لا اسعى للسلطه و المال فقط حسن الخاتمه

هدفى اللى اتعلمته من الكتب اللى اولها القرأن هى الاخره مش الدنيا ولا المنصب فلما يجى نموذج انسانى زى النموذج الاول امشى معاه ايوه هيوصلنى لطريق الخير لانه متسق مع الكتب السماوية و الاخلاقيه

طيب و النموذج الثانى هبعد عنه مهما كان مكتوب عليه انه ده الشرع و الدين لانه مش متسق لا مع الشرع ولا الدين و مش هيوصلنى لطريقى لحسن الخاتمه فهبعد عنه

و اذكر الانسان الثانى بقصه سيدنا موسى عندما امره الله بالذهاب الى عبد من عباده الصالحين ليكتشف سيدنا موسى ان الله اتاه من العلم ما لا يوجد عند النبى موسى لدرجه انه لم يستطيع معه صبرا و كان الخضر حقا اعلم بما ينفع الناس فى القصص الثلاثة التى مر بها

فلا يغتر احد بهويته ولا بشعاره ولا بفصيله فالدين لم يمنح الله توكيله لاحد واذا كنت انت عامل مساعد على خروج الناس من الدين كنت انت نفسك خارجا عن الدين

و تذكرو " عدلت فأمنت فنمت يا عمر "